Kreu i SPAK-ut u shprehu gazetarëve pandjeshmërinë për çfarë thotë Berisha karshi tij apo institucionit që përfaqëson. “Nuk kemi ndjeshmëri. Respektojmë vendimin e gjykatave. Jemi zbatues të ligjit. Kur nuk kënaqemi, ushtrojmë të drejtën e ankimimit. Kërkesat e SPAK janë gjetur të drejta nga shkallët e gjyqësorit dhe Kushtetuesja i dha fundit të gjithave”, tha ai gjatë një takimi me mediat, pak pasi Berisha ishte për detyrim paraqitje në SPAK, pas së cilës lëshoi akuza në stilin e tij.
Po ashtu, Dumani përcolli verdiktin e SPAK-ut të pak ditëve më parë, se ndaj Olsi Ramës nuk oishte gjetur asnjë fakt për implikimin e tij në ndonjë aferë droge, siç pretendonte opozita mbi “Xibrakën”.
“Përgjigja është ajo që keni marrë. SPAK ka kryer hetimet dhe ka vendosur pezullim për mos zbulimin autorëve. U hetua edhe përfshirja e Ols Ramës, nuk u gjet provë. U pezulluan hetimet për shkak se nuk është regjistruar emri i tij si person në hetim. Në rast se do ishte në hetim, do kishte pushim të çështjes”, argumentoi Dumani.
Ai bëri gjithashtu me dije rreth nisjes së një strategjie të re hetimi, atë mbi krimet zgjedhore.
“Kam deklaruar që do të publikoj strategjinë e hetimit të krimeve zgjedhore, strategjia thuajse ka përfunduar, pritet miratimi”, tha ai. /tesheshi.com/
