Zakonisht, produktivitetin e perceptojmë si një fryt të motivimit të brendshëm të njeriut dhe etikës së tij të punës. Disa njerëz janë punëtorë më të zellshëm se të tjerët për nga vetë natyra dhe duhet të vlerësohen për arritjet e tyre. Megjithatë, të dhënat e fundit tregojnë se produktiviteti është fryt i një sërë faktorësh më të ndërlikuar, disa prej të cilëve nuk janë gjithmonë në dorën tonë.
Por, në vend që të fokusohemi te faktorët që dalin jashtë kontrollit tonë, është mirë të merremi me përmirësimin e gjërave të vogla, që janë brenda mundësive. Përmirësime të tilla nuk kushtojnë, mund të kryhen në mënyrë të menjëhershme dhe kanë një ndikim të rëndësishëm në produktivitetin e punës.
Një mënyrë efikase për të sjellë ndryshime në ambientin ku punojmë, është krijimi i një sfondi natyral, me ngjyrë të gjelbër, duke vendosur elementë të tillë, si: lule, ujë, e të tjera gjëra të ngjashme, të cilat mund të ndryshojnë humorin dhe të rrisin cilësinë e punës.
Një studim i fundit, i publikuar nga Journal of Environmental Psychology, vë theksin në një fenomen që mund të burojë nga biofilia – dëshira e natyrshme e qenieve njerëzore për të qenë të lidhura me natyrën.
Për fat të keq, vetëm pak kompani mund të shpenzojnë fonde të caktuara sot, për të krijuar në ambientet e punës, hapësira të gjelbra e çlodhëse për punonjësit e tyre. Për këtë arsye, vetë punonjësit duhet të krijojnë kushte të shëndetshme sipas mundësive në zyrat ku punojnë. Një mënyrë e mirë dhe pa shpenzime për ta bërë këtë, është vendosja e luleve natyrale, e akuariumeve të vegjël me peshq, e posterave me pamje natyre apo pozicionimi i tavolinës së punës me pamje nga dritarja, prej nga ku mund të hidhni vështrimin në horizont. /tesheshi.com/
