Gjermania ka nevojë për të paktën 1.5 milionë emigrantë në vit nëse dëshiron të ruajë numrin e qytetarëve që janë aktivë në tregun e punës, tha ekonomistja dhe këshilltarja e qeverisë federale Monika Schnitzer.
“Ne kemi nevojë për kaq shumë njerëz për të mbajtur numrin e nevojshëm të njerëzve në tregun e punës”, tha ajo për Sueddeutsche Zeitung.
Një nga anëtarët e grupit këshillimor ekonomik të qeverisë federale, i njohur gjerësisht si “Të urtët ekonomikë”, thotë se ky numër është i nevojshëm duke pasur parasysh faktin se shumë njerëz largohen nga Gjermania çdo vit.
Ajo shpjegoi se reforma e ligjit të imigracionit të qeverisë federale është një “hap i mirë” në drejtim të rritjes së numrit të fuqisë punëtore të kualifikuar.
Schnitzer tha se, përveç reformës së ligjeve të imigracionit dhe heqjes së pengesave burokratike, Gjermanisë i duhet edhe një “kulturë mikpritëse” në mënyrë që ekspertët të ndihen më rehat në Gjermani.
Intoleranca e të djathtëve ndaj të huajve
“Jo çdo vend pune kërkon njohuri perfekte të gjuhës gjermane.”Në vend të kësaj, punonjësit në zyrat e të huajve duhet të flasin anglisht,” tha ajo.
Në lidhje me intolerancën gjithnjë e më të pranishme ndaj të huajve, Schnitzer paralajmëroi një reduktim të mundshëm të investimeve.
“Kur Intel ndërton një fabrikë çipash në Magdeburg, në lindje të vendit, do që edhe ekspertët nga jashtë që sjell në këtë fabrikë të ndihen rehat”, tha Schnitzer.
Në lindje të Gjermanisë, partia populiste e krahut të djathtë Alternativa për Gjermaninë (AfD), e cila kundërshton çdo lloj imigrimi, aktualisht po përjeton një rritje të fortë të popullaritetit.
Pak ditë më parë Bundestagu pranoi reformën e ligjit që do të mundësojë imigrimin e punëtorëve të kualifikuar në bazë të parimit të pikëve, ngjashëm me vendet klasike të emigracionit si Kanadaja dhe Australia.
Ligji duhet të lehtësojë emigracionin jo vetëm për specialistët me arsim akademik, por edhe për punëtorët me diplomë të shkollës së mesme. /tesheshi.com/
