Presidentja e Kosovës Vjosa Osmani ka takuar të martën kryeministrat e Holandës dhe të Luksemburgut, Mark Rutte dhe Xavier Bettel, me të cilët ka biseduar për situatën aktuale të sigurisë në veri të Kosovës.
Osmani tha se Kosova ka treguar vullnet për depërshkallëzimin e situatës, duke ofruar organizimin e zgjedhjeve të reja në veri dhe se vendosja e rendit dhe ligjit është në përputhje me investimet shumëvjeçare të shteteve të Bashkimit Evropian me qëllim të promovimit, mbrojtjes së shtetit dhe sundimit të ligjit në gjithë territorin e Kosovës.
Ajo shprehu përkushtimin e institucioneve të Kosovës për tejkalimin e sfidave me partnerët dhe aleatët, njoftoi Presidenca e Kosovës.
Osmani theksoi se “sulmet ndaj pjesëtarëve të Policisë së Kosovës, EULEX-it, KFOR-it, qytetarëve dhe gazetarëve nga strukturat ilegale dhe kriminale në veri të Kosovës nuk duhet të mbeten pa u ndëshkuar”.
Për procesin e dialogut me Serbinë, ajo tha se Kosova vazhdon të jetë palë konstruktive, ndërsa Serbia refuzon të zbatojë marrëveshjet e arritura, si dhe se shkel marrëveshjen e fundit të Brukselit të konfirmuar në Ohër.
Edhe kryeministri Kurti u takua me dyshen europiane, duke thënë se jua ka bërë të qartë që Kosova është pro normalizimit të marrëdhënieve me Serbinë, se dëshiron zgjidhje evropiane dhe se është i nevojshëm zbatimi i plotë i Marrëveshjes së Ohrit.
“Ne duam një zgjidhje evropiane dhe për këtë kemi një marrëveshje bazë nga 27 shkurti dhe një aneks implementues për të cilin dëshirojmë që të zbatohet në tërësi, pa vonesa dhe pa kushte”, tha Kurti.
Sipas tij, është e nevojshme të intensifikohet zbatimi i marrëveshjes dhe tha se është gabim i madh që Serbia nuk e respekton marrëveshjen, sepse në këtë mënyrë i hapi rrugën shkeljes dhe moszbatimit të saj.
“Nuk duhet të drejtosh gishtin dhe të kërkosh fajtorin”
Rutte dhe Bettel pas takimit në Prishtinë thanë se është e nevojshme të qetësohen tensionet në veri të Kosovës, sepse kjo është e rëndësishme, jo vetëm për stabilitetin dhe paqen në rajon, por edhe për prosperitetin e integrimit në BE.
“Ne shprehëm shqetësimin tonë për rritjen e tensionit ndërmjet Kosovës dhe Serbisë. Holanda dhe Luksemburgu po përpiqen të shkojnë drejt dialogut dhe të depërshkallëzojnë situatën dhe të normalizojnë marrëdhëniet mes dy vendeve”, tha Rutte.
Ai tha se BE-ja nuk duhet të tregojë me gisht dhe të kërkojë fajtorin mes Kosovës dhe Serbisë për situatën e tensionuar në veri, por duhet të ndihmojë.
Bettel theksoi se çdo mundësi e krijimit të krizës, nga e cila vuan më së shumti populli, duhet të eliminohet dhe se është e rëndësishme që Kosova t’i besojë punës së ndërmjetësuesve të BE-së.
Rutte dhe Bettel mbërritën në Kosovë pasi vizituan Beogradin të hënën, ku u takuan me presidentin serb Aleksandar Vuçiç. /tesheshi.com/
