Ish-nr.2 i FIFA-s, uruguajani Eugenio Figueredo është pezulluar përjetësisht si zyrtar futbolli, e kjo pas akuzave për marrje ryshfeti. Njëherësh do i duhet të paguajë një gjobë prej 1 milion franga zvicerane.
Ky ndëshkim nga Komiteti i Etikës i FIFA-s vjen për faktin e provuar se Figuered a marrë miliona dollarë ryshfete në kuadër të Kampionatit Kontinental (Copa America) në cilësinë e tij si ish-president i Shoqatës së Futbollit të Amerikës së Jugut (CONMEBOL).
Figueredo, ish-presidenti i Shoqatës së Futbollit të Uruguait, ka qenë nën arrest shtëpiak që nga 2015, dhe u arrestua në Zyrich atë vit.
87-vjeçari, kujton AFP, shërbeu në komitete të shumta të FIFA-s.
Ai u arrestua në Zvicër me disa zyrtarë të tjerë në aferën “FIFAGATE”. Më pas u ekstradua në Urugua, kur ra dakord me gjykatat për të dhënë informacione për mashtrimet, veçanërisht në FIFA dhe CONMEBOL. /tesheshi.com/
