Sinjalizimi i rritjes së pranisë ushtarake të NATO-s pranë kufijve rusë është shoqëruar menjëherë me një reagim nga zyrtarët e Kremlinit.
Sipas zëvendësministrit të Jashtëm rus, Aleksey Meshkov, kjo prani e shtuar e NATO-s nuk do të mbetet pa përgjigje.
“Pala ruse ka theksuar në mënyrë të përsëritur se shtimi i pranisë ushtarake të NATO-s pranë kufijve rusë cenon frymën e paktit bazë Rusi-NATO, e nuk mund të lihet pa përgjigje nga vendi ynë.”
Meshkov, që do të fliste të hënën në një konferencë të organizuar nga Dhoma e Tregtisë Ruso-Italiane, do të thoshte më tej, “Ne jemi të shtrënguar të garantojmë sigurinë e vendit tonë.”
Në fillim të majit, ministri rus i Mbrojtjes, Sergey Shoigu, njoftoi për planet për të dislokuar dy divizione të reja në perëndim të vendit, si dhe një në jug, për t’iu përgjigjur kësaj pranie të shtuar ushtarake të NATO-s pranë kufijve rusë.
Akoma më herët, në mars, i dërguari i Rusisë në NATO, Aleksandr Grushko, do të premtonte një përgjigje tërësisht asimetrike nëse aleanca ushtarake i përmbahej një plani për të dislokuar njësi të reja të koracuara në Europën Lindore.
Reagimet e fundit ruse kanë ardhur pas deklaratave të shefit të NATO-s në Poloni, në një vizitë dyditore atje.
Jens Stoltenberg, sekretari i përgjithshëm i NATO-s, do të thoshte qartas në Varshavë: “Planifikuesit tanë ushtarakë kanë parashtruar propozimet për një numër batalionesh në vende të ndryshme në rajon. Kjo prani e shtuar, e bashkuar me aftësinë për të dislokuar shpejt forca të NATO-s, ka për të dërguar një mesazh të qartë. Një sulm mbi Poloninë, apo mbi ndonjë aleat tjetër, do të nxisë një përgjigje nga e tërë aleanca.” /tesheshi.com/
