Përkundër nënshkrimit të armëpushimit në Siri mes forcave rebele dhe regjimit të Assadit, mbështetësi kryesor i këtij të fundit, Rusia, ka mohuar armëpushimin në rrethinat e Alepos me pretekstin se aty ka “terroristë”.
Pas sulmeve kundër një spitali në qytetin veriperëndimor të Sirisë, Alepo, ku vdiqën dhjetëra civilë, ka befasuar me deklaratën e tij, zv.ministri i jashtëm rus Gennadi Gatilov, të shtunën. “Ne nuk do zmbrapsemi dhe do mbështesim ushtrinë siriane në luftën kundër terroristëve.
Situata në Alepo është pjesë e këtij bashkëpunimi,” tha Gatilov për agjenturën e lajmeve Interfax. Gjatë ditës së sotme kanë vijuar bombardimet në lagjet e Alepos të kontrolluara nga rebelët, ku së paku janë vrarë pesë persona. Bombardimet kanë ardhur nga ushtria siriane.
“Por grupet opozitare, të cilat kanë marrë pjesë në procesin e paqes, nuk do i sulmojmë. Këtu kemi bashkëpunim me amerikanët,” tha më tej diplomati rus, duke shtuar se qëllimi i tij është “likuidimi i milicëve terroristë të ISIS.”
Megjithatë, organizatat perëndimore kanë potencuar se Rusia me “terroristë” quan edhe rebelët të cilët janë trajnuar nga NATO-ja.
Në tetë ditët e fundit në territoret e Alepos janë vrarë 244 persona duke shtuar dyshimet për vlefshmërinë e armëpushimit të nënshkruar. Beteja e Alepos njihet si “Nëna e të gjithë betejave” dhe regjimi i Assadit dëshiron të përfitojë sa më shumë zona karshi rebelëve. /tesheshi.com/
