Rrjeti social Facebook tha se ka informuar hetuesit amerikanë se i ka shitur reklama një kompanie ruse, e cila ka pasur në shënjestër votuesit në SHBA, gjatë zgjedhjeve presidenciale, vitin e kaluar.
Zyrtari për siguri i Facebook-ut, Alex Stamos, tha se po bashkëpunon me hetuesit në Kongres dhe në Departamentin e Drejtësisë, të cilët janë duke hetuar raportet për ndërhyrjen e dyshuar të Rusisë në zgjedhjet amerikane.
Gazeta Ëashington Post, duke cituar njerëz të afërt me çështjen, tha se Facebook ka shitur 100,000 dollarë reklama te kompania ruse, e cila ka histori të promovimit të propagandës pro Kremlinit.
Fushata ka konsistuar në hapjen e “llogarive të rreme” dhe ueb-faqe që kanë përhapur pikëpamje përçarëse mbi migrimin, të drejtat për armë, racën dhe të drejtat e homoseksualëve, tha Stamos
Ai po ashtu theksoi se reklamat kanë nisur në verën e vitit 2015 dhe se vetëm një pjesë e vogël e tyre kanë përmendur direkt kandidatët e atëhershëm për president të SHBA-së, Donald Trump dhe Hillary Clinton. /tesheshi.com/
