Nuk ka mundur të miratohet në Këshillin e Sigurimit të OKB-së një rezolutë që kërkonte një armëpushim shtatëditor në Halep. Dështimi për miratimin e saj qe përgjegjësi e drejtpërdrejtë e Rusisë dhe Kinës, që vunë veton.
Kjo ishte hera e gjashtë që nga viti 2011 që Rusia vë veton për një rezolutë të Këshillit të Sigurimit mbi Sirinë. Të njëjtin veprim e ka përsëritur Kina për të pestën herë.
Vetoja e Rusisë u paralajmërua më herët nga ministri i Jashtëm i këtij vendi, që e quajti një “hap provokues” propozimin për një armëpushim të përkohshëm.
Vetoja ruse u argumentua kështu me arsyetimin se armëpushimi do t’i lejonte kryengritësit të rigrupoheshin, e se nevojitej kohë për bisedimet mes Rusisë dhe SHBA-së.
“Duke i marrë në konsideratë të gjitha aspektet dhe zhvillimet e fundit të situatës, projektrezoluta, që vjen në sfondin e iniciativës ruso-amerikane, është përgjithësisht një hap provokues që i minon përprjekjet ruso-amerikane,” do të thoshte Sergej Lavrov në një konferencë shtypi.
Në terren, aty ku luftohet, forcat e regjimit sirian kanë përparuar më tej, duke marrë një tjetër lagje të Halepit gjatë natës. Dy e treta e territorit në lindje të qytetit, gjer më tash nën kontrollin e kryengritësve, është në duart e tyre. /tesheshi.com/
