Çështja e Rudina Hajdarit, nëse është apo jo kryetare e grupit parlamentar demokrat të së ashtuquajturës “opozitë e re”, nuk është mbyllur. Pretendenti si i tillë, Korab Lita, doli para medias për të thënë se është pikërisht ai kryetar grupi e jo Rudina, të cilën e trajtoi si “zgjedhje” të Gramoz Ruçit.
“Bazuar në njoftimet në media dhe informacionet nga Kuvendi, disa deputetë kanë shprehur dëshirën të na bashkohen, jam në pritje të shkresave të tyre. Shpreh mirënjohjen deputetëve që duan të na bashkohen. Grupi ynë ka pasur edhe raste pranimi edhe raste si ai i Andi Përmetit, që është rrëzuar kërkesa për pranimin e tij në grupin parlamentar.
Asnjë deputet nuk mund ti bashkohet grupit, se do Gramoz Ruçi të mbajë Rudina Hajdarin në krye të grupit, i bëjmë thirrje të mos fusë hundët, atë nuk e vendos ai, por rregullorja jonë dhe deputetë. Grupi dhe unë si kryetar i shprehim mbështetjen për Rudina Hajdarin si bashkë-kryetare e reformës zgjedhore, pasi është kauza jonë kryesore. I tërheqim vëmendjen se aty është si përfaqësuese e opozitës parlamentare dhe jo përfaqësuese ‘ad hoc’ e Gramoz Ruçit”, tha ish-numri dy i Bashkisë së Kamzës, i cili morri mandat deputeti pas djegies së tyre nga kolegë demokratë në shkurt. /tesheshi.com/
