Rruga e re Kardhiq-Delvinë, ajo që ka si pikë fundore Sarandë në jug, duke e afruar dhe më shumë në kohë me Tiranën, u ka sjellë buzëvarjen dhjetra drejtuesve të automjeteve, të cilët kanë bërë “syrin qorr” përballë tabalave të kufizimit të shpejtësisë. Për pasojë, e kanë pësuar nga makina inteligjente dhe devotshmëria policore në zbatimin e rregullave.
Policia e Shtetit bën me dije se nëpërmjet monitorimit me makinat inteligjente, dronët dhe radarët automatikë, janë pezulluar 20 leje drejtimi në 48 orët e fundit, për shpejtësi mbi 30 km/h mbi normën e lejuar.
Gjithashtu. 95 masa administrative janë vendosur për qarkullim me shpejtësi, por pa sanksionin e pezullimit të lejes së drejtimit.
Po ashtu, 67 drejtues mjetesh janë ndëshkuar masa administrative, për parakalime të gabuara, teksa 54 masa janë vendosur për përdorim të celularit gjatë drejtimit të automjetit dhe 50 masa për mospërdorim të rripit të sigurimit.
“Drejtues mjetesh: Rregullat e qarkullimit rrugor janë manuali për një jetë të sigurtë, zbatimi i tyre është detyrimi ligjor dhe moral që kemi ndaj njëri-tjetrit, në hapësirën që ndajmë bashkë.
Policia Rrugore nuk ka për qëllim shtimin numrit të masave administrative, por ka për qëllim parandalimin e aksidenteve rrugore. Në destinacion arrin i sigurtë në rast se zbaton rregullat e qarkullmit.
Monitorimi vijon në të gjitha rrugët e vendit”, thuhet në njoftimin zyrtar policor, pjesa e ndërgjegjësimit. /tesheshi.com/
