Sot është shënuar incidenti më i rëndë që kur Rusia nisi fushatën ajrore në Siri shtatorin e shkuar në mbështetje të regjimit të Beshar Esadit.
Një helikopter ushtarak rus, një transportues Mi-8, është rrëzuar nga rebelët në provincën e Idlibit. Ministria ruse e Mbrojtjes bëri me dije se helikopteri po kthehej nga një mision humanitar në qytetin e rrethuar të Halepit.
Në helikopter gjendeshin tre pjesëtarë të personelit të fluturimit, e dy oficerë ushtarakë. Të pestë kanë humbur jetën me rrëzimin e mjetit fluturues.
Nuk është ende e qartë se cili grup qëlloi mbi helikopterin dhe e rrëzoi atë.
Kjo është humbja më e madhe në njerëz për Rusinë që prej nisjes së fushatës ushtarake në Siri. Në dy incidente të ngjashme të mëhershme, humbjet kanë qenë më të vogla.
Dy pilotë rusë u vranë në korrik, kur helikopteri i tyre u qëllua dhe u rrëzua nga ISIS-i në lindje të qytetit të Palmirës.
Një pilot gjeti po ashtu vdekjen nëntorin e një viti më parë, pasi avioni i tij luftarak, një Su-24, u godit nga forcat turke dhe u rrëzua teksa shkeli hapësirën ajrore të Turqisë. /tesheshi.com/
