Nga Blendi Gashi
Lajmin për liberalizimin e vizave qytetarët e Kosovës e pritën me shumë gëzim. Shumë prej tyre kanë keqkuptuar liberalizimin e vizave, pasi vlerësojnë se kjo është një mundësi e mirë për të punuar në vendet e Bashkimit Evropian.
Mosinformimi i qytetarëve nga ana e qeverisë së Kosovës, siç duket lehtësisht mund të rikthej ikjet masive të kosovarëve drejt vendeve të BE-së pas vendimit për heqjen e vizave, por këtë herë ikjet legale nga vendi.
Ende janë të freskëta pamjet nga stacioni i autobusëve në Prishtinë ku për rreth dy muaj, dhjetor të vitit 2014-të dhe janar të vitit 2015-të dhjetëra mijëra qytetarë nga mbarë Kosova morën rrugën ilegale drejt shteteve të perëndimit për një jetë më të mirë.
Andaj, qeveria e Kosovës, konkretisht Ministria e Integrimit Evropian duhet të organizojë një fushatë vetëdijësuese mujore që të informoj në mënyrë të saktë qytetarët se çfarë nënkupton në të vërtetë liberalizimi i vizave.
Nëse nuk ndodh një gjë e tillë padyshim se Kosova do të “zbrazët”, sepse qytetarët janë në prag të shpërthimit nga gjendja e vështirë sociale dhe mos gjetja e një pune që do t’u krijonte një jetë normale në vendlindjen e tyre.
Ikjet masive drejt vendeve të BE-së padyshim se do të sjellnin problem të madh pasi do të rrezikohej në masë të madhe kthimi i regjimit të vizave, meqë është përmendur si opsion edhe ky kushtëzim nga BE.
Çollaku: Qytetarët s’do ta keqpërdorin liberalizimin e vizave
Pavarësisht një rreziku të tillë, ministri i Integrimit Evropian, Bekim Çollaku, ka thënë ditë më parë në një intervistë dhënë për mediat kosovare se Ministria që drejton ai, nga viti i kaluar ka nisur kampanjën për vetëdijesimin e qytetarëve lidhur me procesin e liberalizimit të vizave, duke u fokusuar në dhënien e shpjegimeve të qarta se çka nënkuptohet me këtë proces, cilat janë të drejtat dhe obligimet për qytetarët si dhe hollësi të tjera.
“Jemi të bindur që qytetarët e Kosovës nuk do të keqpërdorin me këtë të drejtë, pasi që liberalizimi i vizave në asnjë rast nuk mundëson punësim në shtetet e zonës Schengen, nuk jep të drejtë të kërkohet azil si dhe nuk lejon tejkalim të ditëve të përcaktuara të qëndrimit në shtetet përkatëse, pra 90 ditë në çdo gjashtë muaj. Një fushatë e tillë do të intensifikohet në ditët dhe javët e ardhshme”, ka deklaruar ministri Çollaku.
Emini: Fitorja të mos kthehet në humbje
Kryetarja e Komisionit parlamentar për Integrime Evropiane, Njomza Emini thotë se duke u mbështetur në eksperiencat e së shkuarës por edhe tek mundësitë e reja që po krijohen për qytetarët e Kosovës, nuk do ketë hapësirë për t’u “keqpërdorur” liria e lëvizjes.
Emini, thotë se vetëdija kombëtare është e atillë, sa qytetarët duhet ta kuptojnë se të lëvizurit lirshëm nuk nënkupton migrim dhe as qëndrim përtej normave të paracaktuara.
“Ndaj, ne do punojmë pa ndalur, do jemi pranë qytetarit për ta informuar lidhur me gjithë procesin, rregullat, kufizimet, përparësitë e ndalesat. Kështu, do bëhen përpjekje të vazhdueshme që kjo fitore të mos përkthehet në “humbje”.
Liria dhe mirëqenia e qytetarit është e shenjtë, por rregullat s’mund, s’duhet dhe s’do të shkelen as shpërfillen, në mënyrë që vendi jonë të mos marrë nota / përshtypje dhe përgjigjie negative si faturim për neglizhencën e kosovarëve!”, ka thënë Emini për tesheshi.com.
Njohësi i Integrimeve Evropiane, Emrush Ujkani, thotë se pas marrjes së liberalizimit të vizave ekziston mundësia që qytetarët e Kosovës veçanërisht ata të cilët janë në gjendje të vështirë ekonomike në Kosovë të shohin si mundësi të vetme qëndrimin më të gjatë në vendet e zones “Shengen”.
“Si rrjedhojë e kësaj i mbetet institucioneve tona që përveç tjerash të punojnë në ngritjen e mirëqenies sociale në vendin tone”, thotë Ujkani, për tesheshi.com.
Lepaja: E nevojshme kampanja informuese për qytetarët
Analisti politik, Fadil Lepaja, thotë se qytetarëve të Kosovës u është hapur mundësia të shkojnë në shtetet e jashtme të krijojnë kontakte dhe të shfrytezojnë rrugët ligjore nëse duan të qëndrojnë më gjatë në shtetet e BEsë, përmes vizave të punës, apo formateve tjera të parapara.
Lepaja, thekson se kosovarët nuk guxojnë të bëjnë punë ilegale, apo qëndrim ilegal përtej kohës dhe rrethanave te parapara me rregullat e BE.
“Me një kampanjë informuese për qytetarët nga ana e institucioneve nuk mendoj se do të ketë një megrim masiv. Fushata është e nevojshme, por nuk shoh rrezik të madh. Duhet t’u sqarohet qytetarëve që paraqitja në procedurë të azilit i ka gjasat shumë të vogla të ketë sukses”, thotë Lepaja, për tesheshi.com.
Ndryshe, Komisionari për megrim, Dimitrios Papadoupolos gjatë qëndrimit të tij në Prishtinë ka thënë se së shpejti do të filloj një kampanjë informuese që të mos keqpërdoret liberalizimi i viazve.
