Nuk ka statistika zyrtare të personave pa shtetësi në Maqedoni, ndonëse aludohet të jenë qindra të tillë. Edhe pse kanë gjithë jetën që banojnë në Maqedoni, ata nuk kanë shtetësi.
“Unë tani nuk mundem as fëmijën tim ta lë që shkojë ku të dojë. Ai ka dëshirë të luaj futboll diku jashtë, ndoshta nesër i duhet të shkojë në Beograd ose Gjermani të luaj futboll. Po iu dha mundësia për futboll, si do ta merrte klubi pa dokumente, pa certifikatë, pa kartë identiteti, pa pasaportë”, tha Miftar Rustemov, person pa shtetësi, banues në Maqedoni.
Që të zgjidhet kjo problematikë, sipas Ministres së Punës dhe Politikës Sociale, duhen bërë ndryshime ligjore dhe regjistrim i personave pa shtetësi.
“Në bashkëpunim me institucionet e tjera do të bëjmë maksimumin që sa më shpejtë të kuptojmë se cilat ligje duhen ndryshuar, dhe e rëndësishme është të kemi regjistër të këtyre qytetarëve të Maqedonisë, sepse nuk kemi numër të saktë se sa janë”, u shpreh Milla Carovska, Ministre e Punës dhe Politikës Sociale.
Në lidhje me këtë problematikë, Komuna e Haraçinës e banuar plotësisht me shqiptarë, ka hapur zyrat për evidentimin e banorëve që jetojnë në këtë vend e që nuk kanë nënshtetësi. Nga Komuna e Haraçinës thonë se kanë marrë iniciativë për t’iu ofruar banorëve ndihmë juridike me qëllim që të përshpejtojnë procedurat për marrjen e nënshtetësisë. Në kompletimin e dokumentacionit të nevojshëm, banorëve iu del në ndihmë sekretari i komunës, Elmaz Misini, i cili thotë se që nga mëngjesi janë dorëzuar mbi 20 ankesa të banorëve të zonës.
“Do të ju ndihmojmë sipas mundësive tona. Të gjitha ankesat e qytetarëve do t’i përmbledhim në një kërkesë të vetme, të cilën do ta dorëzojmë tek Ministria e Punëve të Brendshme, dhe pas asaj autoritetet përkatëse do të japin qëndrimin e tyre për këtë çështje”, u shpreh Elmaz Misini, Sekretar i Komunës së Haraçinës.
Përgatiti: Miradie Hasani – /tesheshi.com/
