Ahmed ez-Zindi, ministri i Drejtësisë në qeverinë e Egjiptit është shkarkuar nga detyra për shkak të komenteve të tij të pakujdesshme në një intervistë televizive.
I pyetur këtë të premte në një televizion nëse do t’i arrestonte një numër gazetarësh të akuzuar se kishin shpifur për të, Zindi qe përgjigjur se do të arrestonte çdokënd. Megjithatë, ai do ta kalonte cakun kur do të thoshte: “Edhe nëse është profet, paqja dhe bekimi i Zotit qoftë mbi të.”
Fraza e fundit është një thënie e shqiptuar sa herë që përmendet Profeti Muhammed, çka linte për të kuptuar se për kë e kishte hedhur fjalën ministri.
Me t’u bërë i vetëdijshëm për fjalët e thëna, ez-Zindi e ka ndaluar menjëherë intervistën dhe ka thënë, “Kërkoj falje nga Zoti.”
Kjo nuk e ka penguar shpërthimin e zemërimit në rrjetet sociale, ku ka pasur pa fund reagime kundër tij. Ez’heri po ashtu ka dhënë një paralajmërim. “Të gjithë të përfshirët në ligjërimin publik dhe në media duhet të respektojnë emrin e Profetit,” lexohet në një deklaratë të qendrës së dijes islame, por pa e përmendur ministrin.
“Rrëshqitje gjuhe” i ka quajtur Ahmed ez-Zindi fjalët e tij në një tjetër dalje televizive një natë më pas.
Kryeministri, Sherif Ismaili, e ka shkarkuar atë nga detyra të dielën, ndërsa ka zëra se më parë i ka kërkuar dorëheqjen.
Ez-Zindi është vënë edhe më parë në qendër të vëmendjes për deklaratat e tij. E tillë ka qenë ajo e janarit në të njëjtin televizion, ku do të deklaronte se, “nuk do të kënaqej derisa të vriteshin 10.000 anëtarë të Vëllazërisë Muslimane për çdo martir,” duke nënkuptuar forcat ushtarake dhe policore. /tesheshi.com/
