Zyrtari i lartë i Agjencisë Evropiane të Barnave (EMA) Christa Wirthumer-Hoche u bëri apel anëtarëve të BE që të përmbahen nga miratimi i përdorimit të vaksinës ruse Sputnik V për përdorim emergjent në nivel kombëtar, derisa agjencia të shqyrtojë plotësisht sigurinë dhe efektivitetin e saj.
“Ne kemi nevojë për dokumentacion në bazë të të cilit do të bënim një vlerësim. Tani nuk kemi të dhëna për personat e vaksinuar, është e panjohur. Kjo është arsyeja pse unë do t’u bëja apel vendeve të BE-së që të mos miratojnë vaksinën Sputnik për përdorim urgjent”, tha ajo.
“Në të ardhmen, ne mund ta kemi Sputnik në treg, kur të kemi të dhënat e nevojshme dhe analizën e tyre. Një procedurë e tillë është duke u zhvilluar në EMA,” shtoi ajo.
Ajo nuk përjashtoi mundësinë që Sputnik të paraqitej në ofertën e vaksinimit në vendet e BE.
“Para kësaj, është e nevojshme të bëhet ekspertiza, të cilën e filloi EMA. Të dhënat që vijnë nga prodhuesi rus do të rishikohen sipas standardeve evropiane për cilësinë, sigurinë dhe efikasitetin. Nëse gjithçka shkon mirë, vaksina do të miratohet,” shtoi Wirthumer-Hoche.
Sputnik V tashmë është aprovuar ose është afër aprovimit në tre vende të BE – Hungari, Sllovaki dhe Republikën Çeke – dhe zyrtarët e Bashkimit Evropian thanë se Brukseli mund të fillojë negociatat me prodhuesin e vaksinave nëse të paktën katër vende e kërkojnë atë.
EMA do të konsiderojë gjithashtu përdorimin e vaksinës amerikane Johnson & Johnson dhe një takim i posaçëm për të miratuar vaksinën do të mbahet më 11 mars.
“Ne presim një vlerësim pozitiv dhe që Komisioni Evropian do të miratojë përdorimin e vaksinës shumë shpejt,” shtoi një zyrtar i lartë i Agjencisë Evropiane të Barnave. /tesheshi.com/
