Shenasi Rama, profesori i New York University, nismëtari i lëvizjes studentore por i mënjanuar më pas nga Sali Berisha, ka dhënë një version të ri për ngjarjet e tmerrshme të 2 Prillit 1991. Nga shtëpia e tij në St Agustine, në Florida, pak minuta më parë professor Rama, shkodrani që ka qenë bashkë me disa të huaj më datën 2 Prill thekson se mund të kishte gjakderdhje më të madhe, madje edhe më herët në janar 1991 qe u ndalua…
Deklarata e plotë
“Sot është një ditë e veshtirë në historinë e shqiptarëve. Shoku im Ben Sulo më kujtoj atë ditë që unë kurrë nuk kam dashtë me e përmendë. Ben Broci ka kenë i heshtur, student i spikatur në Lëvizjen Studentore, shumë i repektuar nga të gjithë, nuk e ka pasë atë përgatitje me kenë politikan, por shok e mik i mirë i joni, kemi punue bashkë, komshi i vjetër, dhe që e kam njohur qysh femijë se jemi rritë në një rrugicë në Zdrale. i mënjanuar si kam qenë, mundem me thanë se e kam ditë mirë çka ka me ndodhë, kam ikë nga Shkodra fshehtas me disa të huaj mbrëmjen e 1 Prillit, kemi ba disa takime, dhe në mengjesin e 2 Prillit kam ngritë të gjithë delegacionet e Europës që ishin në Hotel Dajti me i nisë për Shkodër e me ndalë gjakderdhjen. Kam shkue edhe në zyrën e dikujt para orës 8:00 e ky zotnia më tha se nuk kishte çka me ba. Ka kenë diçka që ishte vendosë me kohë. Kam kenë besoj me Marco Panella e një makine tjetër me njerez të tyre… ishte edhe Kraja, nje student i italishtes, si përkthyes në mos gaboj, anipse italishtja e ime ishte shumë e mirë, e na kanë mbajtë në Bushat për një ore e gjysem; nuk e ndalëm atë që kishte me ndodhë, por mendoj se një nga arsyet pse nuk shkoj ma keq, sepse kishte mundë me shkue edhe ma keq, ka kenë edhe prania e kërcënimi se do të kalohej ai postbllok me makinë nga këta të huajt pa pyetë për policinë.
Ka shumë gjana që kanë ndodhë në ato dy -tre dite, dhe gjithkush mundet me tregue të vetat… Më 3 Janar 1991 e kam ndalue turmen me sulmue Komitetin e Partisë, ama më 2 Prill, Shkodra i besoj Azem Hajdarit, deputetit të vet nga Tropoja, Pjetër Tomës, Ali Spahisë e do plehrave të tjerë që kanë dashtë që shqiptarët me u vra ndër vedi dhe e ka pague e do ta pagojë shumë me randë ketë lloj sjelljeje. kur e futem ne dhe Ben Brocin kam ndenjë urtë por kam ecë para funeralit, i vetëm, me një plumb që ka kenë nisë për mue e mbas meje kam pase bash ata që e kanë nisë atë plumb. Sot, që jam në shtepinë time, e në qytetin tim ku ndjehem mire, në St. Augustine, Florida, mendoj për atë që ka ndodhë 24 vjet ma parë dhe ndjej vetëm keqardhje për kohën e humbur, për brezat e shkatërruem, për vullnetin e shpërdoruem, dhe për talljen që është luejte me atë qytet që nuk iu ka besue djemve të vet por atyre që kanë dashtë vetëm me e përdorue dhe e kanë përdorue si kanë dashtë. Ben Broci u prehte në paqe sepse është vra kot, por sakrifica e tij nuk duhet me u çnderue e keqpërdorue, sepse ashtu vazhdon krimi që u luejt në atë ditë. Ne shokët e tij do ta nderojmë përjetë sakrificën e tij sublime sepse u vue midis turmes e plumbave dhe dha jeten për me ndalë gjakderdhjen. RIP”.
(tesheshi.com)
