Nga redaksia
A po i vjen fundi ushtrisë më kriminale në Evropë që njeh historia e njerëzimit që pas Luftës së Dytë Botërore, ushtri kjo që njihet në tërë opinionin botëror për krimet e tmerret që i ka kryer mbi popullatën civile të së paku 4 vendeve; ushtri kjo që ka tmerruar 25 milion banorë të një shteti që tashmë ka vdekur, pra ish-Republikës Federative Socialiste të Jugosllavisë?!
“Ushtria e Serbisë është në shpërbërje e sipër. Çdo vit, nga radhët e saj largohen së paku 800 pjesëtarë që kanë kontrata të rregullta të punës me këtë ushtri famëkeqe”, i ka thënë tesheshi.com një epror i strukturave të saj.
Sipas tij, ushtria e Serbisë ka shumë probleme, ku më i madhi është dekriminalizimi i saj nga oficerët që kanë marrë pjesë në kryerjen e krimeve të luftës në Slloveni, Kroaci, Bosnje, dhe më pas në Kosovë.
“Arsyeja se përsë këta ushtarakë largohen nga ushtria janë të shumta: problemet e pagave që janë të ulëta, kushtet shumë të vështira të ushtrimit të detyrës, gjendja e mjerë teknike, ushqimi i dobët, problemet e banimit, e të tjera e të tjera, prej të cilave nuk është i kënaqur askush”, ka thënë ushtaraku serb në kofidencë.
Oficer i kësaj ushtrie që ka mbaruar Akademinë Ushtarake të Këmbësorisë në Beograd, e që shërben në qytetin e Kralevës, ka theksuar se paga e tij mujore me përgatitje të lartë shkollore është më e ulët se e një pastruesi në qeverinë e Serbisë.
“Çka po mendoni, se një person i cili ka të mbaruar shkollën e lartë, pra Akademinë Ushtarake, me këto standarde shumë të ulta, deri dhe fyese, që ka sot ushtria e Serbisë, do të vesh uniformën dhe do të jetë tërë jetën i angazhuar nën rripa?! Jo, kjo nuk do të ndodhë”, ka thënë oficeri serb nën dëshpërim.
Nëse nuk ndryshon diçka në këtë situatë, unë personalisht ose do të kërkojë pensionim të parakohshëm, ose do ta hedh këtë uniformë dhe do të shkojë në ndonjë punë tjetër”, ka shtuar ai.
Dhe ai, për ta ilustruar atë që thotë mbi derexhen e ushtrisë serbe, përcjell një statistikë, sipas së cilës, vetëm në janar dhe shkurt të këtij viti, ushtrinë e Serbisë, për shkak të kushteve shumë të këqija në të gjitha aspektet e kanë braktisur 252 anëtarë të saj.
Në anën tjetër, sindikata e ushtrisë së Serbisë, në një njoftim ka theksuar se 44 për qind e të angazhuarve në ushtri me kontrata, janë të pakënaqur me kushtet që ata kanë, si dhe me pagesat e tyre që janë minimale.
Për të plotësuar kërkesat e ushtrisë sa i përket resurseve njerëzore, pas dezertimeve-largimeve masive, Ministria e Mbrojtjes e këtij vendi ka shpallur një konkurs për pranimin e 420 pjesëtarëve me kontratë, me qëllim të plotësimit të nevojave të saj.
Por dhe kjo formë nuk pritet ta shpëtojë ushtrinë famëkeqe nga degradimi.
“Oficerët e karrierës po ikin, ndërsa në vend të tyre Ministria e Mbrojtjes po sjell njerëz jo-profesionistë. Ushtarakët e denjë nuk formohen brenda natës dhe nuk merren nga rruga, por ata duhet të shkollohen me vite të tëra për t’iu përgjigjur lartësisë së detyrës”, ka thënë oficeri serb nga Kosova që shërben në ushtrinë e Serbisë në Kralevë.
Gjithashtu, radhët e ushtrisë serbe po degradojnë dhe nga korrupsioni që ka përfshirë drejtues të lartë të saj, sipas asaj çfarë pohon ushtaraku serb.
“Përveç namit të keq që na kanë lënë luftërat e pakuptimta që ushtria e Serbisë ka zhvilluar në vendet e ish-Jugosllavisë, tani eprorët ushtarakë janë lëshuar në krim, korrupsion e kontrabandë të armëve dhe municioneve”, ka thënë ai.
“Të gjitha në ushtrinë e Serbisë janë në shitje, që nga municionet e deri tek eksplozivet e llojeve të ndryshme. E tërë kjo është duke u bërë nga shumica e oficerëve që kanë marrë pjesë në luftra, e tani po ndihen të tradhtuar e të lënë pas dore nga udhëheqësia, si në paga ashtu edhe në trajtimim që iu bëhet atyre”, përfundon rrëfimin e tij të trishtë oficeri serb nga Kosova, i cili gjeti këtë mënyrë për të denoncuar atë çka e mundon prej kohësh. /tesheshi.com/
