Nga Donat Maloku
Gjendja e të arrestuarve në Maqedoni raportohet të jetë e rëndë. Disa prej tyre kanë plagë të ndryshme në trup dhe nuk po marrin trajtim të nevojshëm mjekësor. Edhe fotot e publikuara nga mediat në Maqedoni kanë treguar pamjen e rëndë të burgosurve shqiptarë, me plagë të rëndë në gjithë trupin.
Ndërkohë që shumica prej të arrestuarve janë kosovarë, Kosova edhe në këtë fazë mund të bëjë kërkesë për ekstradim, pasi ka një marrëveshje me shtetin e Maqedonisë. Një kërkesë të tillë Kosovës ia mundëson marrëveshja e arritur vite më parë me këtë shtet.
Portali mbarëkombëtar ‘tesheshi.com’, ka realizuar një bisedë me gruan e një prej të burgosurve kosovarë që vazhdojnë të mbahen në burg në Maqedoni që nga koha e arrestimit pas luftimeve që ndodhën më 9 maj në ‘Lagjen e Trimave’, në Kumanovë.
Emri i gruas është i njohur për redaksinë, por ajo për shkaqe sigurie të burrit të saj, nuk ka pranuar të identifikohet, duke thënë se nëse do ta bënte një gjë të tillë burri i saj do keqtrajtohej edhe më shumë.
Ajo ka treguar se që nga arrestimi veç njëherë e ka vizituar në burg burrin e saj dhe ka pasur mundësi të bisedojë vetëm 15 minuta. Tregon se gjendja e tij shëndetësore dhe të burgosurve tjerë është e rëndë. Thotë se ata janë keqtrajtuar në ditët e para kur janë arrestuar dhe kanë qenë pothuajse të vdekur, ua kanë thyer brinjtë. Prangat për katër ditë nuk ua kishin hequr për asnjë moment nga duart.
Gruaja e cila është informuar nga mediat për arrestimin e burrit të saj thotë, se ai i ka thënë se po shkon në një shtet të Evropës, dhe nuk i ka treguar për Maqedoni.
Gruaja e të burgosurit tregon se kanë të drejtë dy herë në muaj të vizitojnë familjarin e tyre, derisa thotë se vizita e radhës do të jetë me 3-4 qershor.
I burgosuri, sipas gruas së tij është mërzitur shumë kur ka mësuar lajmin për vdekjen e shokëve gjatë luftimeve në Kumanovë, përderisa ndjehen të mashtruar nga dy persona, një brenda grupit që ka qenë me ta, dhe një person nga jashtë.
Rrëfimi i plotë:
Kam frikë që ja rëndojë situatën burrit në flas me emër. Për mua ka qenë shok i vërtetë lajmi!.
Unë nuk kam qenë në dijeni burri im që ka shku në Maqedoni. Ai më ka thënë se kam punë në një shtet të Evropës. E kam ditë që u shku atje. Ma ka përmend se po organizohen njerëzit por nuk më ka treguar më shumë. Por, në asnjë moment nuk më ka thënë se po shkoj me luftu. Nuk ka mundur të shkoj në Maqedoni sepse e ka pasur të ndalur të hynë në këtë shtet për shkak të luftës të zhvilluar në vitin 2001.
Unë kam marr vesh nga mediat se më është arrestuar burrin.
Që nga momenti që është arrestuar vetëm një herë e kam vizituar burrin timdhe kemi zhvilluar një bisedë vetëm 15 minuta, jo më shumë.
Burri më ka treguar se në katër ditët e para të arrestimit pasi i kanë në stacionin policor, shumica prej të arrestuarve kanë qenë gjysmë të vdekur. Gjatë këtyre katër ditëve edhe prangat për asnjë moment nuk ua kishin hequr. Prangat u kishin hyrë thellë në mish. Duart u ishin bërë në gjendje të rëndë.}
Burri im kur doli të më takoi i kishte pasur duart të lidhura me një fasho.
Katër ditët e para, as ushqim dhe as ujë nuk u kishin dhënë. 99 për qind kanë të kohës kanë qenë pa vetëdije, të alivanosur. Të burgosurit shqiptar tha se i kanë kthy në jetë.
Në këtë gjendje na kanë detyruar të nënshkruajmë një letër. Por, burri tha se kanë qenë të keqtrajtuar e të lodhur dhe nuk e din çfarë kanë nënshkruar.
Nuk ishin veç këto lëndime. Poashtu edhe shpinën e kishte të dëmtuar shumë. Brinjtë më tha që i kam të thyera, dhe se ka dhimbje të madhe. Burri im në fytyrë nuk kishte shenja dhune.
Gjatë bisedës burri kishte afër edhe tre policë dhe nuk mund të tregonte çfarë dëshironte.
Gjendja e të gjithë të burgosurve është jo e mirë. Shpresoj që Qeveria e Kosovës dhe Maqedonisë të arrijnë një marrëveshje.
Disa prej të burgosurve kanë lëndime serioze. Kanë nevojë për operacione. Por se di a do ti qojnë në spital edhe pse të arrestuarit kanë thyerje nofullash.
Të arrestuar më duke janë 19 persona. Burri më tha se ishte mërzitur shumë kur kishte mësuar lajmin për vdekjen e shokëve të tij nga Kosova.
Të burgosurit janë të ndarë nëpër qeli të ndryshme. Burri tha se sikur të mos ishte mashtrimi që OSBE janë duke u marr mbrojtje, të gjithë do ishim të vdekur sepse nuk do pranonim kurrë të dorëzoheshim vetëm në duar të Policisë e ushtrisë!
Burri im tha se dyshojnë që dy persona i tradhtuan gjatë aksionit që zhvilluan në Lagjen e Trimave. Njëri prej tyre dyshohet se ka qenë brenda grupit, kurse tjetri jashtë.
Më date 3 ose 4 qershor e kemi vizitën e radhës, ku do të takoj sërish burrin tim për të pare gjendjen e tij. Në telefon nuk ka lënë të bisedojmë, andaj për shëndetin e tij mund të njoftohem vetëm gjatë vizitave, që i kemi dy herë në muaj.
Burri më tregoi se prej ditës që janë transferuar në burgun e Shutkës nuk janë keqtrajtu.
Veç zoti e di nëse do të lirohen nga burgu. Sipas avokatës njëherë jo!
/tesheshi.com/
