Shyqri Nimani, i cili 9 vjet më parë u përzgjedh si artisti që do ta kaligrafonte tekstin e Deklaratës së Pavarësisë së Kosovës në pergamenë, sot thotë se ndjehet me fat që ju dha rasti të bëhet pjesë e historisë së shtetit të tij.
Tregon se viti 2008 është njëri nga vitet më dinamike, më kreative dhe më të rëndësishme në jetën dhe karrierën e tij artistike.
“E ndjeja se Dielli i Lirisë do t’i ngrohte zemrat e popullit tonë aq të përvuajtur. Por, unë isha tërësisht i koncentruar në obligimin tim që brenda 16 orëve të kryeja një detyrë aq me përgjegjësi”, ka thënë Nimani, në një intervistë për gazetën “Bota Sot”.
Ai thotë se kishte ndjenja të jashtëzakonshme të gërshetuara me një përgjegjësi gjithashtu të jashtëzakonshme, derisa tregon kur u kontaktua nga qeveria.
“Vetëm një javë para shpalljes së pavarësisë, më njoftuan nga Qeveria, se unë do ta bukurshkruaja me dorë këtë deklaratë. Rrjedhat morën kahje tjetër nga ajo që unë kisha paramenduar për bukurshkrimin e Deklaratës. Unë mendoja, ç’është e vërteta, se teksti do të ishte në një faqe A/4 dhe do të më duheshin më së paku 5 ose 6 ditë për ta shkruar ashtu siç dëshiroja. Por ndodhi krejt ndryshe. Kur arrita në godinën e Qeverisë së Kosovës (në mbrëmjen e 16 shkurtit 2008) ma dhanë tekstin e deklaratës, i cili, për befasinë time shumë të madhe, ishte në 3 faqe të plota A/4!”, tregon Nimani.
Ai më tej tregon edhe edhe sa orë kishte në dispozicion për ta kaligrafuar Deklaratën.
“Sipas kërkesës së Kryeministrit, unë i solla nga studioja ime veglat, ngjyrat dhe 2 pergamenet (lëkurë viçi, nga 80 x 50 cm) të sjellur nga Muzeu i Londrës. Ndërkaq, shefi i protokollit, z. Abedin Qupeva, më pyeti se a mund të ishte edhe qeveria e Kosovës së bashku me mua bashkautorë e kaligrafimit të Deklaratës. Unë i thashë se kjo gjë nuk kishte rëndësi në këtë çast, kur unë isha aq i ngarkuar nga frika, se a do të mund ta kryeja këtë detyrë për një kohë shumë të shkurtër – prej vetëm rreth 16 orëve. Abedini më tha se, meqë sonte është vonë, kontratën e autorësisë mund ta bëjmë javën tjetër”, ka treguar artisti Nimani. /tesheshi.com/
