Nga Blendi Gashi
Rrahja deri në përgjakje e gazetares Arbana Xharra, e sapo futur në politike duke u rreshtuar me PDK-në e Veselit, është një sinjal se kjo fushatë elektorale që pritet të nisë në Kosovë, mund të shoqërohet me incidente të ngjashme për vetë tensionin që pritet të bartë. Kjo, edhe për mënyrën se si po vijnë këto zgjedhje pas mënyrës se si i u rrëzua qeveria, të cilat në një pjesë të politikës kanë nxitur jo pak irritim e shtim inatesh.
Një rast tjetër i freskët mbetet edhe kërcënimi ndaj aktivistit Agron Kabashi, teksa javë më parë shoqëronte me veturë sekretarin organizativ të Vetëvendosje-s, Dardan Molliqaj, në studiot e Klan Kosovës, për xhirimin e një emisioni.
Dhe nëse drejtuesit e partive politike nuk bëjnë thirrje për ulje të tensioneve tek anëtarët e tyre, nuk përjashtohet mundësia të ndodh edhe më e keqja, tërheqin vëmendjen, ekspertë të sigurisë dhe analistë politikë.
Burim Ramadani, mendon se ekzistojnë disa grupacione që kanë për synim tensionimin dhe acarimin e këtyre javëve të fushatës, dhe sipsa tij, këto kryesisht ndërlidhen me PDK-në dhe VV-në.
“Të dyja rastet e kanë shumë gabim, sepse qytetarët e Kosovës nuk u kanë borxh atyre asgjë. Përkundrazi, këto logjika acaruese duhet të ndalen menjëherë, sepse kjo ndikon jashtëzakonisht keq në sigurinë kombëtare të Kosovës. Nuk besoj se do të mund të vazhdojnë më tutje, sepse jam i bindur se do të dekodohen dhe diskreditohen në publik”, tha Ramadani për tesheshi.com.
Fadil Lepaja, analist politik, thotë se partitë politike më së miri do të ishte të heshtin e shteti të veprojë, jo vetëm për këtë rast.
Lidhur me atë se a ka rrezik të situata të tensionohet dhe më tej, Lepaja thotë se kjo varet nga ata që e kanë projektuar këtë lloj krize dhe pasigurie.
“Sidoqoftë pasojë e kësaj do të jetë atmosfera e rëndë dhe ndjenja e pasigurisë qoftë nëse shteti mobilizohet qoftë nëse nuk reagon fare. Kjo në fakt është edhe arsyeja përse askush qëllimëmlrë nuk rekomandonte zgjedhje ë jashtzakonshme. Kështu të gjithë janë të dyshimt”, tha Lepaja për tesheshi. com.
Agron Halitaj, gazetar, njëherit njohës i rrethanave politike, thotë se dhuna duhet dënuar pavarësisht se ndaj kujt ushtrohet, dhe se kryerësit e sulmeve duhet të mos paragjykohen, por duhet pritur që organet kompetente të hetimit ta thonë fjalën e tyre.
“Policia dhe organet e drejtësisë e kanë për obligim që t’i zbardhin rastet sa më shpejt dhe mos ta lënë vendin që të futet në ankthin e pasigurisë për të folur e për të lëvizur lirshëm. Sa më paragjykues të jemi dhe sa më pak zbardhje të rasteve të kemi, aq më tensionuese bëhet gjendja në vend. Kjo s’duhet të ndodhë, as tash kur jemi në prag të zgjedhjeve, e as pas zgjedhjeve”, thotë Halitaj, për tesheshi. com.
Gazetari tjetër, po ashtu njohës i rrethanave politike, Adriatik Kelmendi, duke përmendur dy rastet e lartcekura, paralajmëron se mund të ndodh edhe më e keqja.
“Me këtë mendësi së shpejti do të shohim edhe viktima. E viktimat do të jemi ne, shqiptarët, që kemi filluar të mos e durojmë njëri-tjetrin. Deri në linç, publik e fizik!”, paralajmëron Kelmendi. /tesheshi.com/
