Njeriu i rëndësishëm i DASH-it që vjen të hënën në Tiranë, e ka kursyer opozitën shqiptare nga akuzat se po bën lojën e Rusisë në rajon duke nxitur destabilitet politik me bojkotin e zgjedhjeve.
I ndodhur në Budva të Malit të Zi në forumin rajonal për siguri, Zëvendësndihmës-sekretari amerikan i Shtetit, Hoyt Brian Yee vuri theksin tek projekti rus për të frenuar integrimin euroatlantik të Ballkanit. Ai e zbërtheu këtë projekt duke renditur vatrat e tensionit në rajon, por pa e përmendur Shqipërinë, ku të hënën do të shkelë në një përpjekjë finale për të nxjerrë opozitën nga çadra.
“Jemi qenë dëshmitarë të retorikës nxitëse dhe të politikave ndarëse; kemi parë gazin lotsjellës në Kuvendin e Kosovës, politikanë në Republika Srpska të cilët kërcënojnë me ndarje; turmën e tërbuar që pushtoi parlamentin në Shkup dhe opozitën në Mal të Zi e cila po e bojkoton jetën parlamentare”, ka thënë Hoyt Yee.
Dhe në fjalën e tij ai është ndalur posaçërisht tek Kosova, duke përcjellë shpresën se shumë shpejt çështja e demarkacionit do të mbyllet
“Shpresoj se kryeministri i ri i Kosovës ta gjejë mekanizmin për të miratuar marrëveshjen për demarkacionin me Malin e Zi “, ka thënë diplomati i lartë amerikan. /tesheshi.com/
