Nico Rosberg, piloti gjerman i Mercedes-it, ia ka dalë të fitojë sot në Çmimin e Madh të Singaporit, duke u rikthyer sërish në kryesimin e renditjes së pilotëve në këtë sezon të Formulës 1.
Në Marina Bay, në një atmosferë ndezëse mes projektorëve, Rosberg ka fituar të tretën garë radhazi. Piloti gjerman ka bërë një garë pa asnjë gabim, duke e merituar vendin e parë.
Makina e sigurisë do ta merrte garën nën kontroll që në xhiron e parë, pas përplasjes së Hulkenberg-ut me muret rrethuese.
Gara do të vijonte më pas e pandërprerë. Rosberg do të pilotonte plot siguri në një pjesë të mirë të xhirove, por një strategji më e zgjedhur e Red Bull-it në lidhje me ndërrimin e gomave do ta vinte atë në vështirësi. Xhirot e fundit do të kishin ankth për të, me Ricciardo-n që afrohej sekond pas sekonde. Gjithsesi për australianin do të ishte i pamundur vendi i parë, teksa e mbylli garën i dytë, me gjysmë sekonde pas Rosberg-ut.
Hamilton, në vështirësi vazhdimisht me makinën e tij, e fitoi po ashtu vendin e tretë falë strategjisë, pasi Raikkonen e kishte parakaluar më herët në pistë. Finlandezi siguroi vendin e katërt, në një garë të pëlqyeshme për Ferrari-n.
Vettel do të shpallej piloti i ditës, dhe, në fakt, e meritoi këtë. Nga vendi i fundit, ai do të renditej i pesti, me një seri parakalimesh spektakolare.
Verstappen do ta kalonte finishin i gjashti, i ndjekur nga Fernando Alonso, që gjithashtu pati një garë shumë pozitive me McLaren-in e tij. Perez, Kvyat e Magnussen qenë midis pilotëve që përfunduan në dhjetë vendet e para e që morën pikë.
Nico Rosberg ka 273 pikë tani, përkundër 265 pikëve të Hamilton-it.
Ndalesa e radhës është në Malajzi, pas dy javësh. /tesheshi.com/
