Vetëm pak orë pas zyrtarizimit të transferimit të Carlos Tevez-it në kampionatin kinez të futbollit falë një kontrate shumëmilionëshe, mësohet se një ofertë akoma më gjigande i është bërë yllit portugez të Realit të Madridit, Cristiano Ronaldo-s.
Agjenti i portugezit, Jorge Mendes, ka deklaruar për Sky Sports se Reali i Madridit ka marrë një ofertë prej 300 milionë eurosh për lojtarin.
Nuk bëhet i ditur emri i klubit kinez, që gjithashtu ka premtuar 100 milionë euro në vit për Ronaldo-n.
“Nga Kina kanë ofruar 300 milionë euro për Realin e Madridit dhe më shumë se 100 milionë euro në vit për lojtarin,” ka rrëfyer Jorge Mendes.
E përditshmja spanjolle Marca sugjeron se dhe Nike, sponsori kryesor i Ronaldo-s, është e interesuar për transferimin, pasi do të qe një reklamë e mirë për të në tregun aziatik.
Jorge Mendes e ka përjashtuar mundësinë e lëvizjes së lojtarit për në Kinë, duke thënë se kjo nuk ishte në interes të klientit të tij.
“Paratë nuk janë gjithçka. Klubi spanjoll është jeta e tij!”
Kalimi i futbollistëve dhe trajnerëve të njohur në futbollin kinez është tendenca më e fundit e sportit më të ndjekur në botë. Shumë lojtarë nuk u kanë rezistuar ofertave astronomike, ashtu si të tjerë, si Ronaldo, i kanë refuzuar prerë ato. /tesheshi.com/
