Që momenti i Realit të Madridit është ndër më negativët të periudhës Zidan, kjo është evidente, por Kristiano Ronaldo kundërshton ta quajë krizë. Portugezi u tregua i prerë për gazetarët, kur iu sugjeroi të mos nxitoheshin për ta parë “të zezë” tablonë.
“Ju mund të thoni cfarë të doni, por nuk ka krizë tek Reali. Një apo dy ndeshje jo të mira, nuk do të thotë se ka krizë. Ju e dini çfarë është në gjendje të bëjë Reali e cfarë mund të bëj unë. Nëse nuk e dini, klikoni në Google emrin tim”- deklaroi me nerva të nxehta Ronaldo.
Gjatë humbjes së të mërkurës që Reali pësoi nga Totenhemi, Ronaldo është parë disa herë t’u “ulërasë” shokëve të skuadrës. Duke përfshirë edhe humbjen “politiko-sportive” që madrilenët pësuan në kampionat me Xhironën, opinioni sportiv nuk i ka kursyer komentet negative, për ta dhënë si “të mbaruar” ciklin e Realit nën erën Zidane.
Madje vetë trajneri francez, i quajti “të ngordhur” lojtarët e tij pas ndeshjes me Xhironën. Për këtë shkak gazetarët kërkuan opinionin e Ronaldos për gjendjen e skuadrës, edhe pse portugezi nuk pranon “të përkulet” kurrë, por synon të luftojë për të fituar çdo betejë.
Reali i Madridit “rrëshqiti” në vendin e dytë në grup për ndeshjet e Ligës së Kampioneve, si edhe ndodhet në vendin e katërt në kampionatin spanjoll, 8 pikë më pak se Barcelona. /tesheshi.com/
