Në pritje për t’u ndeshur të martën me Realin e Madridit në Champions League, Napoli ka arritur një fitore të madhe në kryeqytetin italian.
Napoli ka mposhtur 1-2 Romën në “Olimpico”, duke i shkaktuar humbjen e parë në shtëpi gjatë këtij sezoni të Serisë A.
Vendasit paguan përgjumjen e pjesës së parë, të shfrytëzuar më së miri nga Mertens. I njëjti lojtar do të dyfishonte rezultatin në pjesën e dytë, pak minuta pasi i qe anuluar në mënyrë të dyshimtë një tjetër gol.
Roma mori zemër me hyrjen e Mohamed Salah-ut në fushë; tentativat e njëpasnjëshme u shpërblyen me një gol të minutës së 89-të, të realizuar nga Strootman.
Pepe Reina bëri mrekullinë në minutën e 93-të, me dy ndërhyrje radhazi, duke shmangur një barazim të çasteve të fundit.
Disfata nuk ia ndryshoi gjithsesi pozitën Romës, që vijon të mbetet pas Juventusit, veçse me Napolin tani dy pikë pas. /tesheshi.com/
