Asgjë nuk ka shkuar siç duhet për Napolin para tifozëve të tij. Në “San Paolo”, në ndeshjen hapëse të javës së tetë të Serisë A, Roma ka fituar 1-3 dhe është ngjitur në vendin e dytë në renditje, vetëm dy pikë larg Juventusit, që sonte luan ndaj Udinezes.
Napoli ka vuajtur mungesën e polakut Milik, i dëmtuar, e që do të mungojë për një kohë të gjatë. Rezultati është zhbllokuar dy minuta para mbarimit të pjesës së parë, kur dhe ka shënuar Dzeko, duke i kaluar kryeqytetasit në avantazh.
Ka qenë i njëjti lojtar që në pjesën e dytë ka thelluar shifrat, e pikërisht atëherë kur Napoli po bënte presion për të barazuar.
Goditja me kokë e Koulibaly-t në minutën e 58-të ka rihapur lojën, që ka patur në vijim momente mjaft të mira, me sulme e kundërsulme në të dy anët e fushës.
Për të ardhur te minuta e 85-të, kur Mohamed Salah i ka çuar shifrat në 1-3. Napoli ka rrezikuar të pësojë një humbje më të thellë, pasi romanët kanë patur raste të njëpasnjëshme. Për t’u shënuar një goditje nga jashtë zonës e Mertens-it, e pritur shkëlqyeshëm nga portieri mik.
Elseid Hysaj u aktivizua gjatë gjithë lojës, me dalje të shpeshta në krahun e djathtë. Në dy golat e Dzeko-s u duk të ishte pjesë e vendosjes së gabuar të mbrojtjes.
Kjo ishte humbja e dytë radhazi për Napolin, pas asaj të 2 tetorit ndaj Atalantës, duke zbritur në vend të tretë në klasifikim. Një pozicionim që mund të jetë dhe më poshtë mbasi dhe skuadrat e tjera t’i luajnë ndeshjet e tyre. /tesheshi.com/
