Në “Olimpico” të Romës nuk pati fitues në mbrëmjen e së shtunës, ndërsa Roma e Interi e mbyllën ballafaqimin e tyre me rezultatin 1-1.
Ndryshe nga rëndom në këto javët e fundit, skuadra vendase ngjau më e turbullt, pa ditur se si ta kërkojë fitoren. Në një ndeshje ku luhej posaçërisht për vendin e tretë në renditjen e Serisë A, romanët nuk patën kthjelltësinë e duhur, duke u ndalur për herë të parë pas tetë fitoreve të njëpasnjëshme në kampionat.
Më i freskët u duk Interi, që kaloi dhe në epërsi në minutën e 53-të. Goli i avantazhit u shënua nga Perisiç. Avantazh që nuk do të mund ta ruante gjer në fund. Futja e Xhekos i dha më ritëm lojës së Romës, që e gjen golin pak para fundit. Eshtë minuta e 84-t, kur një top i gjuajtur keq nga Xheko shkon në këmbët e Nainggolanit, dhe ky e dërgon atë në rrjetë.
Rezultati 1-1 i lë më të kënaqur vendasit, që ruajtën diferencën me pesë pikë ndaj kundërshtarëve të mbrëmshëm, e janë të konsoliduar tanimë pas Juventusit dhe Napolit.
Sot pasdite luhet dhe derbi i Torinos, mes skuadrës me të njëjtin emër dhe Juventusit. Torino nuk është më ajo skuadra e vitit të shkuar, dhe mes dy ekipeve të të njëjtit qytet ka një diferencë prej 34 pikësh, por kjo nuk e zbeh aspak vlerën e këtij derbi. Të gjitha parashikimet flasin për një fitore të Juventusit, edhe pse në ndeshjet derbi asgjë nuk është e sigurt. /tesheshi.com/
