Presidenti i Filipineve ka premtuar se asgjë nuk do ta ndalë në luftën e tij kundër drogës, madje ajo do të jetë brutale.
Më shumë se 8.000 njerëz kanë vdekur që prej marrjes së postit nga Duterte në mesin e vitit të shkuar, por ai nuk ngjan të tutet nga mundësia e vënies përpara Gjykatës Ndërkombëtare Penale.
“Mësymja kundër korrupsionit, kriminalitetit dhe drogave do të rifillojë, do të vazhdojë dhe do të jetë brutale,” ka deklaruar ai.
Duterte ka reaguar dhe ndaj një rezolute të Parlamentit Europian që i dënon vrasjet pa gjyq në fushatën e tij kundër drogës.
Duke folur nga Mjanmari, ai i ka quajtur të marrë parlamentarët europianë.
“Nuk arrij t’i kuptoj këta të marrë. Pse po përpiqeni të na imponoheni? Pse nuk shihni punën tuaj?”
Rodrigo Duterte, i njohur për gjuhën e tij të ashpër, premtoi më shumë vrasje në këtë fushatë.
“Më shumë njerëz do të vdesin. Unë thashë se nuk do të ndaloj. Do të vazhdoj gjersa të jetë vrarë dhe lordi i fundit i drogës në Filipine.”
Rezoluta e Parlamentit Europian i kërkon Këshillit të OKB-së për të Drejtat e Njeriut nisjen e një hetimi mbi luftën ndaj drogës të presidentit filipinas. /tesheshi.com/
