Rivelino Çuno, kryetari i PEISH-it, pritet në një takim zyrtar në Shkup nga Zoran Zaev

Drejtuesi i Partisë për Europianizim e Integrimin e Shqipërisë, Rivelino Çuno, është pritur në selinë e LSDM-së në kryeqytetin e Maqedonisë nga lideri i opozitës, Zoran Zaev.

Takimi është zhvilluar në një atmosferë shumë miqësore dhe të ngrohtë.

Zoran Zaev është bërë tashmë shumë i njohur edhe përtej kufijve të Ish-Republikës Jugosllave të Maqedonisë për atë që njihet nga të gjithë si beteja e “bombave” të Zaevit, apo, siç quhet ndryshe, afera e madhe e përgjimeve.

Ai është udhëheqësi i Lëvizjes Socialdemokrate të Maqedonisë (LSDM), dhe ndërkohë udhëheq protestat popullore kundër regjimit kleptokratik dhe autokratik që ka ngritur në këmbë në Maqedoni ish-kryeministri dhe lideri i VMRO –DPMNE-së, Nikolla Gruevski.

Dy bashkëbiseduesit, Çuno dhe Zaev, diskutuan për një bashkëpunim më dinamik mes tyre dhe dy partive respektive, PEISH-it dhe LSDM-së.

E sigurisht, në takim u fol dhe për varfërinë e tejskajshme të komunitetit egjiptian në Ballkan. U fol gjithashtu gjatë edhe për krizën politike në të cilën është ngërthyer Maqedonia, me ç’rast Zaev u shpreh se, “Zgjedhjet janë të pamundura për t’u zhvilluar, sepse asgjë nuk e garanton lirinë, ndershmërinë, barazinë dhe drejtësinë e tyre në Ish-Republikën Jugosllave të Maqedonisë.”

Gjithashtu, Zaev u shpreh tejet i interesuar për të rritur nivelin e bashkëpunimit me faktorin politik shqiptar në Maqedoni më së pari, por edhe me Tiranën politike e zyrtare. /tesheshi.com/