Rishfaqet “e urryera” e opozitës, Vlahutin: ne, gardianë të votës!

Është rishfaqur në publik “e urryera” e demokratëve, njeriu që është ekzekutuar verbalisht gjatë 3 muajve të çadrës, por dhe më parë, ambasadorja e BE-së në Tiranë, Romana Vllahutin. Gruaja që fill pas miratimit të reformës në drejtësi, është sulmuar ashpër nga opozita deri dhe për stilin e ngjyrën e frizurës, ishte në Shkodër me mision apelimi për ta ruajtur votën e pacenuar nga çdo lloj presioni.

“Çdo lloj presioni apo transaksioni mbi blerjen e votës me para në dorë apo favor tjetër, duhet refuzuar. Ju si përfaqësues të shoqërisë civile keni përgjegjësi më të madhe për të raportuar e monitoruar këto abuzime. Zgjedhjet janë përgjegjësi thelbësore e qytetarëve. Çdo qytetar duhet të jetë vigjilent për çdo element që tenton të abuzojë me procesin. Ne si komunitet ndërkombëtar po planifikojmë të monitorojmë zgjedhjet”, tha njeriu i Brukselit në Tiranë.

Vlahutin paralajmëroi një komunitet ndërkombëtar me “syrin pishë” për të mos lejuar asnjë lloj shkeljeje apo abuzimi.

“Përparësi kemi në monitorimin e lëvizjeve të parave nëse ka abuzime si dhe lëvizjen e administratës. Do të ketë edhe një fushatë ndërgjegjësuese. Në fokus do të jenë qytetaret të cilët do të pyeten nëse kanë parë që shitet vota apo ka korrupsion. Zgjedhjet janë për qytetaret dhe ju nuk keni vetëm detyrë të votoni por keni përgjegjësi edhe për raportim”, shtoi ajo.

 Kjo ishte dalja e parë, e po ashtu deklarimi i parë  në publik i zonjës Vllahutin, që nga arritja e marrëveshjes mes Ramës e Bashës, që çoi më pas në mbylljen e çadrës. /tesheshi.com/