Ndeshjet e Serisë A kanë rinisur dje pas një pushimi pak më tepër se dyjavor. Në shtatë takimet e luajtura gjer tani të javës së 19-të, rezultatet kanë qenë të pritshme.
Empoli ka mposhtur dje Palermon 1-0, duke e thelluar më tej krizën e kësaj të fundit. Po të shtunën, Napoli ka dalë fitues ndaj Sampdorias në ekstremin e lojës. Një autogoli të shqiptarit Hysaj i është përgjigjur Gabbiadini në minutën e 77-të dhe Tonelli në minutën e 95-të. Fitorja 2-1 e Napolit nuk është pritur mirë nga pala kundërshtare, që ia ka vënë fajin gjykimit për humbjen.
Këtë të dielë, ka qenë fillimisht Interi që ka përmbysur rezultatin në Udine, për të fituar 1-2 ndaj Udinezes. Perisic ka shënuar dy herë për interistët, në fund të dy pjesëve.
Me të njëjtin rezultat, 1-0, kanë fituar dy skuadrat e kryeqytetit italian. Lacio ka mundur Krotonen me një gol të Immobile-s në minutën e 90-të. Një autogol i Izzo-s i ka dhënë fitoren Romës në transfertën e Xhenovës.
Në përballjen mes Sasuolos dhe Torinos është regjistruar barazimi i vetëm, për më tepër, pa gola. Përndryshe, rezultati më i thellë i përket takimit Kievo – Atalanta, të fituar 1-4 nga miqtë. Berisha është kthyer pas javësh të mbrojë portën e Atalantës; një kthim që ka qenë me fat, pasi skuadra bergameske ka marrë një trepikësh me mjaft vlerë. /tesheshi.com/
