Pas rreth dy muajsh pushim, sonte luhen takimet e para të 1/8-ave në Champions League, në aktivitetin më me prestigj të futbollit të klubeve në Europë.
Katër prej ndeshjeve të para do të zhvillohen sonte e nesër, e katër të tjera të martën e të mërkurën e ardhshme.
Benfika – Zenit dhe PSG – Chelsea janë dy përballjet e kësaj të marte, ku tërheq vëmendjen natyrisht çifti i dytë.
Skuadra e kryeqytetit francez e dominon pa asnjë luhatje kampionatin vendas dhe shihet si pretendente për t’u kualifikuar për më tej. Kjo duke patur parasysh dhe formën jo të mirë të anglezëve përgjatë këtij sezoni.
Ditën e nesërme do të kemi takimet Gent – Wolfsburg dhe Roma – Real Madrid. Edhe të mërkurën vëmendja do të jetë e përqendruar tek përballja mes italianëve dhe spanjollëve.
Roma ka rigjetur formën e duhur dhe po vijon me rezultate pozitive që prej uljes në stol të Luciano Spalletti-t. E njëjta tablo ndeshet dhe te madrilenët e Real-it, që kanë shpërthyer me ardhjen në drejtim të francezit Zinedine Zidane.
Të tëra takimet do të nisin si zakonisht në 20:45. /tesheshi.com/
