Një aspekt i errët ka pasuar pragtragjedinë e një nate më parë në ujrat mes Vlorës dhe Semanit, aty ku ndahet Joni me Adriatikun, ku Roja Bregdetare shpëtoi dhjetra sirianë të bllokuar në një skaf që do i çonte në Itali, në një rikthim kështu në “epokën e skafeve, atë të trafikut klandestin, siç afro 15 vjet më parë.
Pyetja është se ku janë trafikantët, pasi kanë qenë ata që kanë vënë alarmin për mbytjen e skafit me mbi 50 shpirtëra në bord?
Fjala është për tre trafikantë, që sipas Report TV, në momentin që Roja Bregdetare i është afruar bregut, ata, duke qenë në skafin e tyre, janë hedhur në det në terrin e natës, duke u arratisur kësisoj.
Për këtë kanë nisur hetimet, pasi dyshohet se ikja e tyre është një akt konspirativ.
Kujtojmë se më 9 janar 2003, në ujrat e Jonit do ndodhte një prej tragjedive të ikjes me gomone drejt Italisë, ku dhjetra shqiptarë, kryesisht nga veriu, përfunduan të mbytur në det pa mundësi shpëtimi.
Prej asaj tragjedie, u shkua më pas në bllokimin e tërësishëm të trafikut njerëzor me skafe, fillimisht nga Nano e më pas nga Berisha me një memorandum mjetesh lundruese. /tesheshi.com/
