Eshtë rikthyer përplasja Rama – Vuçiç, por kësaj here e njëanshme, ditë pas një mbledhjeje të dy qeverive, asaj të Tiranës dhe Prishtinës, ku pati jo pak reagime dhe nga Beogradi. Ndërkohë që ditë më vonë, ishte kryeministri Isa Mustafa ai që shpalli një platformë të bashkimit ekonomik mes dy vendeve.
Sot në twitter, Vuçiç është shprehur se nuk do ketë kurrë një bashkim klasik të Shqipërisë me Kosovën, që përkthehet se bashkimi të formave të tjera do ketë, por ai me shkrirje kufijsh, si bashkimi gjerman fjala vjen, nuk do jetë i mundur.
Vuçiç ka bërë thirrje që liderët shqiptarë të mos provokojnë me deklarimet e tyre.
Frika serbe për Shqipërinë e madhe u riaktivizua pas fluturimit të një droni mbi stadiumin ‘Partizani’ të Beogradit, gjatë ndeshjes Serbi – Shqipëri. Beogradi nuk e morri thjesht si një akt të veçuar tifozerie, ndonëse me ngjyrime nacionaliste, por e konsideroi atë si një provokim zyrtar – ose ndryshe “provokacija”.
Autoritetet e Beogradit arritën deri në pikën që ia atribuuan aktin e lëshimit të dronit, pikërisht vëllait të kryeministrit, Olsi Rama, që nuk është as figurë publike, jeton prej vitesh në SHBA dhe për më tepër nuk njihet fare për ndonjë atdhetar a nacionalist.
Më pas, mes Ramës dhe Vuçiçit, do kishte replika gjatë një konference për shtyp në vizitën e kreut të qeverisë shqiptare në Beograd, pikërisht ngase u përmend Kosova.
Reagimi i sotëm i shefit të qeverisë serbe, është në vazhdën e një fobie të rritur të Beogradit politik ndaj Shqipërisë së madhe, ose rritjes së faktorit shqiptar në Ballkan. /tesheshi.com/
