Pas komunikimit në distancë, nga vendet ku kaluan pushimet e përmes shtypit, kryeministri Edi Rama dhe kreu i Kuvendit Ilir Meta kanë zhvilluar një takim mes tyre në zyrën e kryeparlamentarit. Kryeministri i ka shkuar në zyrë Metës, në takimin e parë që nga zgjedhjet e e 21 Qershorit, të cilat gjeneruan edhe kritika e akuza mes socialistëve dhe LSI-së për rezultatet në disa zona.
Pas takimit, palët nuk kanë dhënë komente dhe as deklarata për mediat, ndërkohë që takimi vjen në nisje të sezonit të ri parlamentar, por edhe vendimit për heqje të imunitetit për deputetin socialist, Armando Prenga, arrestuar dy ditë më parë për përfshirje në një incident me armë.
Gjasat janë që në takim të jetë folur sidomos për reformën në Drejtësi, pasi shtatori është përcaktuar nga kryeministri Rama si muaji kur edhe kjo reformë do të nisë të lëvizë përpara.
Para takimit me Metën, Rama kishte thirrur në selinë e PS-së disa ministra e deputetë, si Gramoz Ruçin, Blendi Klosin, Ditmir Bushatin, Lindita Nikollin, Koço Kokëdhimën. /tesheshi.com/
