Piloti australian i Red Bull-it ka siguruar fitoren e dytë sezonale. Pas garës në Kinë, Ricciardo ka triumfuar dhe në Monako.
Megjithatë, nuk ka qenë një garë e lehtë për të, edhe pse e ka nisur nga vendi i parë në start. Makina e tij do të niste të humbiste fuqi pa mbaruar ende gjysma e garës, por Ricciardo ia doli të mbante ritmin, e bashkë me të të mbante pas dhe Vettel-in, që nuk iu nda për asnjë çast.
Ka qenë një garë specifike kjo e Monakos, me vetëm një incident në fund të saj, ndryshe nga tradita, me vetëm tre pilotë të tërhequr, ndryshe po ashtu nga ç’ndodh rëndom. Njëri prej tyre ishte Alonso, që për herë të parë në këtë sezon nuk arriti ta mbyllë garën.
Pesë pilotët e parë në nisje e mbyllën garën pa asnjë ndryshim në pozitat e tyre. Vettel e Hamilton plotësuan podiumin me vendin e dytë dhe të tretë. Raikkonen dhe Bottas erdhën pas tyre.
I vetmi pilot i dalluar për parakalime në Monako ishte Verstappen; nga vendi i fundit, holandezi përfundoi i nënti.
Ricciardo iu bashkua me këtë fitore dy pilotëve që luftojnë për titull. Hamilton do të vijojë të kryesojë, me 110 pikë, ndjekur nga Vettel, me 96 pikë, dhe Ricciardo, me 72 pikë.
Gara e ardhshme e Formulës 1 është në Kanada, dy javë më vonë. /tesheshi.com/
