Nga Blendi Gashi
Çështja e Demarkacionit me Malin e Zi pritet të sjellë tensione të reja në Kosovë, dhe të rikthej sërish përplasjet në kuvend, por edhe dhunën në rrugët e Prishtinës mes policisë dhe përkrahësve të opozitës.
Partitë opozitare, deputetë të caktuar të pozitës dhe njohës të fushës së shenjëzimit të kufijve, vazhdojnë të mbajnë qëndrimin e tyre se Kosova humb mbi 8000 hektarë me marrëveshjen e nënshkruar nga Hashim Thaçi.
Në anën tjetër, pushteti mbetet i palëkundur në qëndrime duke shprehur bindjen se marrëveshja e Demarkacionit duhet të ratifikohet nga deputetët sepse vendi nuk humb asnjë pëllëmbë tokë.
Se mund të ketë trazira të mëdha në vend ka paralajmëruar ish lideri i Lëvizjes Vetëvendosje, Albin Kurti, tani deputet.
Kurti i ka bërë ftesë publike dy partive të tjera opozitare AAK-së e NISMA-s që të rikthehen sa më shpejtë në kuvend dhe të bashkohen me VV-në për të penguar Demarkacionin, me kundërshtime të fuqishme si brenda parlamentit ashtu edhe jashtë me protesta në Prishtinë e qytete të tjera.
Kurti për më tepër ka dhë një një deklaratë bombë duke thënë se me çdo kusht do ta ndalojnë Demarkacionin në kuvend, duke mos u trembur as nga plumbat dhe burgjet e pushtetit.
“Ne do të jemi edhe më radikal se sa ishim muaj më parë, për të mos lejuar. As burgjet e as plumbat e pushteti nuk na ndalin që ta pengojmë Demarkacionin”, ka paralajmëruar Kurti, krerët e pushtetit, Hashim Thaçin, Isa Mustafën e Kadri Veselin.
Opozitari Kurti ka kërkuar që në momentin që Demarkacioni të vije për ratifikim në kuvend partitë opozitare të jenë të bashkuara dhe ta kundërshtojnë fuqishëm miratimin.
“Të përgatitemi për të krijuar alternativën politike dhe kundërshtojmë demarkacionin. Gazi lotsjellës ka pasur efekt jo vetëm mbi qeverinë por edhe mbi neve, na bashkonte më shumë”, ka thënë Kurti.
Por shtrohet pyetja sa mund të jetë reale ribashkimi opozitës, pra AAK-së e NISMA-s me Vetëvendosje-n pas prishjes që ndodhi muaj më parë, ku më pas hodhën akuza të forta mes vete?
AAK e NISMA: Jo metodologji të njëjtë të kundërshtimit me VV-në
Dy partitë opozitare AAK e NISMA thonë se do ta kundërshtojnë fuqishëm Demarkacionin, por nuk besojnë se do të përdorin metoda të njëjta me VV-në siç ndodhi gjatë muajve të krizës.
Avni Arifi, këshilltar i liderit të AAK-së Ramush Haradinajt thotë se Albini nuk ka mandat që të flas për opozitën e bashkuar, dhe ai mund të flas vetëm për VV-në.
“Po më pëlqen ky ndërrim i retorikës së VV-së sepse që nga muaji marsi ata flisnin se si AAK dhe Nisma janë marrë vesh me Kadri Veselin dhe dokrra të ngjashme.
Sa i përket Demarkacionit e vërtetë se VV ka qëndrime të njëjta me ne dhe do të bëjmë përpjekje që ta ndalojmë por sa i përket metodologjisē nuk besoj se do të ketë qëndrim të përbashkët çfarë kemi parë në fillim vit. Jemi parti opozitare të ndara dhe kështu do të mbetet pavarësisht se mbajmë qëndrime të njëjta për Demarkacionin”, ka thënë Arifi, për tesheshi.com.
Deputeti i partisë NISMA për Kosovën, Zafir Berisha, thotë se opozita vazhdon të jetë unike sa i përket çështjes së Demarkacionit.
“Do të jemi bashkë aty ku e kërkon nevoja për mos me lë realizimin e projekteve të dëmshme për vendin siç janë Demarkacioni dhe “Zajednica” dhe secila parti do ta kundërshtoje sipas metodave dhe politikave të veta këtë qeveri siç edhe e kemi bërë dhe kjo është edhe e përbashkëta jonë e madhe.
Albini besoj se e di se jemi në të njëjtën vijë të frontit për këtë çështje, por jemi duke përdor taktika ndoshta pak të ndryshme që mendoj se betejës në të cilen gjendemi i shërben, nëse i referohemi një beteje klasike. Duhet shumëllojshmëri e takrikave në betejë për të pas rezultat. Beteja nuk fitohet me një armë”, thotë Berisha, për tesheshi.com.
Deputeti i NISMA-s më tej thotë se në raport me kundërshtimin e dy marrëveshjeve tri partite opozitare do të vazhdojnë të jenë të bashkuara për interes të shtetit.
“Kur është në pyetje ligjëshmëria dhe kushtetuta e vendit, do të bashkëpunojmë me të gjithë që janë në këtë vijë, dhe do të mbrojmë sovrantitetin e vendit me të gjitha mjetet”, ka thënë Berisha.
