Kryepolici Ardi Veliu ofroi një rezyme të situatës “Kanabis 2020”, e kjo në një konferencë të përbashkët mes Policisë së Shtetit dhe homologes së saj italiane.
“Që në muajin janar nisëm punën me identifikimin dhe analizimin e problematikave të evidentuara gjatë vitit 2019, por edhe në vitet e mëparshme. Mbi bazën e kësaj analize u hartua një plan masash i detajuar, duke u përqendruar në këto drejtime kryesore:
- E para në parandalimin e këtij fenomeni, duke ndërmarrë një fushatë të gjerë ndërgjegjësimi për qytetarët;
Në kontrollin e pandërprerë të territorit, duke goditur rastet e evidentuara që në gjenezë, pra që në momentet e para të tentativës për kultivim;
3. Në identifikimin, gjurmimin dhe sekuestrimin e aseteve kriminale që rrjedhin nga kjo veprimtari kriminale, duke çuar para drejtësisë personat përgjegjës;
4. Në bashkëpunimin me pushtetin vendor, Ministrinë e Mbrojtjes dhe gjithë aktorët e tjerë të përfshirë në Planin Kombëtar të Veprimit;
5. Në bashkëpunimin ndërkombëtar, kryesisht me partnerët italianë;
6. Si dhe identifikimin e ndëshkimin e punonjësve të administratës dhe ata brenda radhëve të Policisë që neglizhojnë, shpërdorojnë detyrën apo bëhen palë me ata persona të kultivojnë apo trafikojnë bimë narkotike”, tha Veliu në fillim të fjalsë së tij, ku më pas ofroi efektet e këtyre 6 pikave.
“– Evidentuam 577 vepra penale për kultivim të bimëve narkotike, nga të cilat 505 janë raste kultivimi dhe 109 procedime proaktive.
– Janë implikuar 468 shtetas, janë arrestuar e ndaluar 284 shtetas.
– Janë konstatuar e janë asgjësuar 137.216 bimë narkotike, nga të cilat 18.828 në kubikë.
Në të njëjtën periudhë të vitit 2019 janë:
– Evidentuar 453 vepra penale, nga të cilat 409 raste kultivimi dhe janë procedime proaktive;
– Janë implikuar 507 shtetas, janë arrestuar e ndaluar 357 shtetas;
– Janë konstatuar janë asgjësuar 90175 bimë narkotike, nga të cilat 14886 në kubikë”, theksoi kryepolici Veliu.
Ndërkohë, në raport ai ofroi dhe treguesit ndëshkimorë në radhët e policisë.
“Me vendosmëri reaguam ndaj çdo konstatimi të moszbatimit të detyrave funksionale, implikimi apo shkelje të Rregullores së Policisë së Shtetit. Si rezultat gjatë vitit 2020 u përjashtuan 3 punonjës nga Policia dhe janë ndjekur penalisht 17 punonjës policie që janë përfshirë në aktivitetin kriminal të kultivimit të bimëve narkotike. Gjithashtu janë dhënë 72 masa për shkelje të rënda disiplinore, 71 masa për shkelje të lehta disiplinore, si dhe janë transferuar 11 punonjës policie në nivele drejtuese.
Gjithashtu, shembull i vendosmërisë së punës tonë, për plotësimin e detyrimeve të Planit Kombëtar të Veprimit në luftë ndaj kanabisit, është edhe procedimi penalisht i 206 zyrtarëve vendorë, administratorë të njësisë administrative, kryetarë fshati dhe inspektorë të shërbimit pyjor, roje ujësjellësi etj., për veprat penale ‘Shpërdorim detyre’ dhe ‘Moskallëzim krimi’”, theksoi njeriu në krye të Policisë së Shtetit.
Sipas Erdi Veliut, “bashkëpunimi i ngushtë me partnerët ndërkombëtarë dhe veçanërisht ata italianë, bëri që gjatë vitit 2020, kultivimi i kanabisit në Shqipëri të shkonte në shifrat më minimale përgjatë tre dekadave të fundit”. /tesheshi.com/
