Mes presidentit dhe kryeministrit të Kosovës, Thaçi e Haradinaj ka vijuar një polemikë e ashpër në Facebook në lidhje me dialogun midis Prishtinës dhe Beogradit.
Kjo pasi liderët e koalicionit qeverisës në Kosovë, kanë hartuar një rezolutë për këtë dialog, i cili pritet të paraqitet për miratim.
Haradinaj, i cili i dha detaje mbi projektin e qeverisë së dialogut me Serbinë, ka përsëritur se aty theksohen se kufijtë e Kosovës mbeten e pandryshuar dhe se nuk do negociohet.
“Në pikën një dhe pikën gjashtë të Rezolutës së Qeverisë, të dakorduar sot me kryetarët e partive të koalicionit qeveritar, është definuar qartë se kufijtë e Republikës së Kosovës, shtet i pavarur, Sovran, demokratik, unik dhe i pandashëm, janë të pacenueshme dhe të panegociueshme dhe se Kuvendi i Republikës së Kosovës, si autoritet suprem, me votat e 2/3 e të gjithë deputetëve, do të Ratifikojë Marrëveshjen Ligjërisht Obligative në mes të Republikës së Kosovës dhe Republikës së Serbisë”, shkroi ai Haradinajn në Facebook.
Ndërsa presidenti Thaçi shkroi se interesat shtetërore të Republikës së Kosovës duhet të jenë gjithmonë mbi çdo parti politike apo interes zgjedhor.
“E përshëndes vendimin e subjekteve politike të koalicionit qeveritar për harmonizimin e qëndrimeve politike dhe hartimin e rezolutës së përbashkët për dialogun. Është shumë e rëndësishme për shtetin tonë, që ne të gjithë të jemi sa më unikë dhe të bashkohemi për mbrojtjen e interesave qytetare dhe shtetërore në dialogun ndërmjet Kosovës dhe Serbisë në Bruksel. Interesi shtetëror i Republikës së Kosovës duhet të jetë gjithmonë mbi çdo interes partiak apo elektoral”, u shpreh Thaçi.
Siç dihet, qyshse presidenti Thaçi promovoi idenë e korrigjimit të kufijve, kundërshtar më të ashpër ka patur kryeministrin Haradinaj. /tesheshi.com/
