Presidenti i Kosovës Hashim Thaçi, ka mundur të lexojë “mes rreshtash” një përkrahje europiane për idenë e korrigjimit të kufijve. Ai i është referuar draft-rezolutës së miratuar nga Komiteti i Punëve të Jashtme i Parlamentit Evropian, ku aty pretendon se gjendet dhe një “ok” që kufijtë mund të ndryshojnë.
“Komiteti i Punëve të Jashtme i Parlamentit Evropian (AFET) ka miratuar dje draft-rezolutën për Kosovën dhe shtetet e tjera të Ballkanit Perëndimor.
E mirëpres dhe i falënderoj eurodeputetët për votimin e djeshëm në Komitet të Punëve të Jashtme të Parlamentit Evropian (AFET) për përkrahjen që i është liberalizimit të menjëhershëm të vizave dhe arritjes së një marrëveshjeje përfundimtare të paqes në mes Kosovës dhe Serbisë.
Vendimi për liberalizim të vizave për qytetarët e Kosovës, jo vetëm që është i merituar, por është i vonuar padrejtësisht.
Lidhur me fazën përfundimtare të dialogut për normalizim të marrëdhënieve ndërmjet Kosovës dhe Serbisë, e mirëpres faktin që AFET bën thirrje për një marrëveshje gjithëpërfshirëse, ligjërisht obliguese, që do të përkrahet nga të gjitha palët, që do të ruajë karakterin shumetnik të shteteve tona dhe nuk do të krijojë kufij përgjatë vijave etnike”, shkroi Thaçi në FB. /tesheshi.com/
