Kryetari i Bashkisë së Tiranës, Erjon Veliaj, i ka kërkuar dorëheqjen drejtorit të ndërmarrjes më të rëndësishme në kompetencën e këtij institucioni: kreun e Ujësjellës Kanalizimeve, Fatbardh Islamaj.
Siç mësohet, Veliaj, me anë të një shkrese i ka bërë të ditur drejtorit të UKT-së se ndërmarrja do të riorganizohet si pasojë e reformës që do të ndërmerret në të gjithë bashkinë.
Kështu ndërsa Ndërmarrja Ujësjellës-kanalizime ka qenë kryesisht nomenklaturë e bashkisë së vjetër, e cila nuk përgjigjej për ish-komunat, tashmë kjo ndërmarrje do të ringrihet nga fillimi në bazë të organizimit të ri territorial.
Ndërkaq, qeveria pritet të marrë disa akte nënligjore për ti dhënë në administrim 61 bashkive të reja ndërmarrjet e bashkuara të ujësjellsave, të cilat përveç Tiranës që janë administruar nga bashkia, në shumicën e vendit kanë qenë nomenklaturë e qarkut.
Kryeministri Edi Rama, gjatë fushatës elektorale ka bërë të ditur se menjëherë pas zgjedhjeve qeveria do të nisë një reform në sektorin e ujit duke u dhënë bashkive administrimin e enteve përkatëse.
Megjithatë, siç mësohet ende nuk pa pasur një lëvizje pas kërkesës së Erjon Veliajt për dorëheqjen e drejtorit të UKT-së. Zoti Fatbardh Islamaj, është emëruar në këtë post nga ish-kryetari i bashkisë së Tiranës, Lulzim Basha, pasi ka punuar për një kohë të caktuar si drejtor i ndriçimit në bashkinë e Tiranës.
Islamaj është përfolur si i afërt me Partinë Demokratike dhe familjar i kryetarit të Gjykatës së Rrethit Gjyqësor, Tiranë.
Gjatë kohës kur PS-ja në opozitë, nga qarqe pranë saj u përfol se kreu i gjykatës së Tiranës ka lidhje familjare me ish-kryeministrin Sali Berisha. Zëra që janë shuar menjëherë sapo PS-ja ka ardhur në pushtet.
Ndërmarrja Ujësjellës Kanalizime Tiranë është një nga më të mëdhatë e sektorit publik dhe fuksionon si shoqëri aksionere ku kontrolluesit më të mëdhenj janë bashkia Tiranë dhe Ministria e Transporteve. UKT ka mbi 1 mijë punonjës dhe menaxhon miliona euro të ardhura.
Pikërisht ky miks interesash ka hapur vend për hipoteza bashkëpunimi ndërmjet PD-së që kontrollonte bashkinë dhe LSI-së që drejton ministrinë e Transporteve në lidhje me të punësuarit.
Në fillim të vitit, një deklaratë periferike e Ministrit të Transporteve Edmond Haxhinasto se do të fillojë një reformë në sektorin e ujësjellsave shkaktoi një tërmet të madh. Kjo deklaratë e dhënë për televizionin Alsat në atë kohë u mor edhe nga Agjencia Telegrafike Shqiptare (ATSH). Drejtori i kësaj agjencie, Gëzim Podgorica, i cili është eksponent i LSI-së jo vetëm hoqi menjëherë lajmin në atë kohë por kërcënoi gazetarët dhe drejtorin e departamentit të Informacionit.
Siç bën të ditur për tesheshi.com një nga gazetarët që ka përjetuar këtë presion, iu bë e ditur se do të ketë masa drastike pasi Haxhinasto nuk e ka bërë deklaratën. Ndërkohë që televizioni që ishte origjina e lajmit nuk e hoqi
/tesheshi.com/
