Restoranti Shish në Londër ka afishuar një njoftim në xhamat e tij ku ftohen të moshuar dhe të pastrehë që të drekojnë apo darkojnë falas me një vakt prej tre pjatash.
Ideja lindi kur një grua e moshuar aty pranë u kërkoi punëtorëve të restorantit ta ndihmonin për të vënë një dritare të re, duke ju ankuar se s’kishte asnjeri që mund ta ndihmonte pasi jetonte e vetëm.
Zonja më pas, në diskutim e sipër, u shpreh se sa e trishtë ishte të kalonte festat e fundvitit vetëm. Të nesërmen punëtorët nxorën njoftimin ku me një shkrim dore thuhej: “Askush nuk do të ulet në tryezë vetëm për festat. Ne jemi këtu për t’ju shoqëruar. Çdo i pastrehë dhe i moshuar është i mirëpritur”
Ndërkohë postimi në mediat sociale është shpërndarë më shumë se 1 mijë herë dhe ka frymëzuar të paktën 25 vullnetarë që të japin ndihmën e tyre për të shërbyer falas atë ditë tek restoranti. /tesheshi.com/
