Pas gati tre muajsh që prej artikulimit për herë të parë, vetëm sot u kuptua se ç’përfaqson “Republika e re” e Bashës. E promovuar deri më sot në nivel mballomatik – thuaj diçka, edhe pse nuk thua asgjë! – ajo qenka një tip Rilindjeje e huazuar e PD-së, me synimin për të efektuar sa më shumë në elektorat ideja se tashmë ekziston një platformë qeverisëse.
Mirëpo çfarë ndodh me këtë “Republikë” të re promovuar fuqishëm në protestën e kësaj të shtune?
Partia Demokratike, e lindur si parti antagoniste e Partisë së Punës, ka hequr dorë nga konservatorizmi i djathtë duke zgjedhur të kërkojë votat e shtresave të mesme dhe të varfra me premtimet tërësisht të majta.
Në fjalimin e kreut të saj Lulzim Basha këto gëlonin, që nga ulja e taksave, ndihma ekonomike, pensionet dhe arsimi, e deri tek fermerët e biznesi i vogël.
Basha e përdori protestën për të hapur fushatën në një fjalim krejtësisht elektoral. Ai tha se “Republika e Re” do t’i kthente dinjitetin ekonomik klasës së mesme.
Premtimet sociale të Bashës:
Taksa të ulëta, rikthimi taksës së sheshtë që ishte në kohën e qeverisjes Berisha 10 përqind por që Basha e premton në nivelin 9 për qind. Sipas tij, kjo do të sillte injektimin e 1 miliardë eurosh në ekonomi që do të mundësojnë mijëra vende të reja pune. (1 miliard euro? Se ku e kemi dëgjuar këtë së fundi…)
Biznesi i vogël– Taksa të përgjithshme që nuk do të kalojnë nivelin e 1.5 për qind të xhiros vjetor
Pensionistët– Nuk do të ketë pension më të vogël se 250 mijë lekë në muaj
Arsimi- Do të rrëzohet ligji i arsimit të lartë, do të ulen tarifat e shkollës; askush nuk do të mbetet pa shkollë sepse s’ka para. Stazh i paguar për të diplomuarit me 200 mijë lekë në muaj.
Arsimi fillor- Drekë falas për fëmijët e fillores dhe zgjatje e orarit të mësimit deri në 16.00 me studim në shkollë. Dyfishim i mësuesve dhe rritje e rrogës së tyre.
Ndihma sociale– Rikthimi në skemën e ndihmës ekonomike të 40 mijë familjeve. Pagimi nga shteti i faturave të enegjisë dhe ujit për ata që nuk kanë mundësi.
Fermerët– Subvencione në bazë të tokës që punohet. Investim në rrugë vaditje, kullim, tregje, ulje e traut të doganës për prodhimin e eksportit që konkuron me prodhimin vendas.
Pronarët e ligjshëm- Pronat do të kthehen dhe kompensohen vetëm sipas vlerës së tregut.
Emigrantët- Garantimi i së drejtës për të votuar përmes sistemit të votës elektronike.
Ndërsa për drejtësinë nuk pati asnjë premtim.
Ky pra ishte pak a shumë programi që do sjellë “Republikën e re”. Por e gjitha kjo po konsumohet jashtë sistemit. Deri më tani, PD nuk pranon ta fusë në garë elektorale “Republikën” e saj me pretendimin se ajo do mundet nga droga e qeverisë. /tesheshi.com/
