Kryeministri Rama tha se ishte plotësisht pro asaj që po bënte Kosova lidhur me reprocitetin në kufi me Serbinë, për të cilën reaguan strukturat paralele në Veri, me bllokim pikash kufitare, deri me tensionim të situatës, të cilat nxiten nga Beogradi.
Me në krah kryeministrin e vendit që s’e njeh Kosovën, Pedro Sanchesin e Spanjës, Rama tha se “Qeveria e Kosovës ka të drejtën dhe detyrën që të zbatojë marrëveshjet duke ushtruar sovranitetin territorial që buron nga një pavarësi në administrimin e shtetit dhe marrëveshjet e dakordësuara me palën tjetër janë marrëveshje për t’u zbatuar”.
Por nga ana tjetër, ai shtoi se pikërisht për këto që po ndodhin, projekti i Ballkanit të Hapur bëhet i domosdoshëm dhe për Kosovën, gjithnjë duke e mbështetur Prishtinën në cështjen e reprocitetit me Serbinë, madje 100 përqind, siç tha.
“Ngjarja e djeshme është pasqyrë e vështirësisë së thellë në këtë marrëdhënie, por zbatimi i marrëveshjes së dakordësuar në Bruksel është e drejtë dhe detyrë e Kosovës dhe e mbështes 100 për qind qeverinë e Kosovës, ashtu sikundër e përgëzoj kryeministrin Kurti për sensin e vetëpërmbajtjes dhe dëgjimin e aleatëve që sugjeruan një shtyrje.
Këto situata nuk tregojnë që qasja jonë ndaj Serbisë dhe politika e afrimit dhe dialogut është e gabuar. Këto situata tregojnë pikërisht pse ne kemi nevojë për këtë. Këto situata tregojnë pikërisht pse duhet Ballkani i Hapur dhe pse Kosova duhet të vijë dhe të ulet në Ballkanin e Hapur. Këto situata tregojnë që ka dy rrugë: rruga e kthimit mbrapa dhe luftës nga e cila nuk fiton më askush dhe rruga tjetër është ndërtimi i paqes. Unë jam me të parën dhe as mos prisni që unë të kem një opinion tjetër”, argumentoi Rama para medias. /tesheshi.com/
