Nga David Haeberli , “La Repubblica”
Adel Mozip ka paralajmëruar miqtë dhe të afërmit se deri më 8 nëntor, ditën kur do të mbahen zgjedhjet në SHBA do t’i shohë më rrallë.
Është e enjte në mbrëmje, dhe ne e shoqërojmë në Dearborn, në periferinë e Detroit, ku ka ardhur të bëjë takime në xhamitë e zonës.
Për t’u falur natyrisht, por edhe për t’u kujtuar besimtarëve për të votuar për të, pasi ky inxhinier informatik 29-vjeçar, shpreson të zgjidhet si anëtar i këshillit arsimor të qytetit.
Për faljen e orës 17.00 xhamia Masjid Alsalam është mbushur plot. Me 45% të popullsisë muslimane, Dearborn është realisht kryeqyteti islam i SHBA-së.
Valët e para emigratore drejt lokalitetit i detyrohen zhvillimit të industrisë së prodhimit të makinave; babai i Adel për shembull, la Jemenin për të ardhur e punuar në stabilimentet e Ford-it.
“E kam takuar vetëm kur isha 4, 6 dhe 12 vjeç, pra kur ai është kthyer në Jemen”, thotë ai.
Por më pas e gjithë familja u transferua në Midwest.
Adel ishte 13 vjeç. Ai ka jetuar më shumë në SHBA se në Jemen: “Shtëpia ime është në Dearborn. Këtu po i rris fëmijët e mi”, thotë ai.
Adel ka themeluar një shoqatë për të promovuar mësimin dhe dijen tek të rinjtë: akses në arsim dhe barazi për të gjithë, idealet demokratike janë pjesë e konstruktit të tij konceptual.
“Megjithatë kam vlera konservatore, martesat gay dhe aborti nuk më entuziazmojnë, jam në mes të dy alternativave politike në SHBA”, vazhdon ai.
Ndërmjet një faljeje dhe tjetrës, Adel vjen shpesh për të mbështetur mikun e tij, Abdullah Hammoud: kandidati demokrat për Dhomën e Përfaqësuesve të SHBA-së, i cili është vetëm 25 vjeç dhe sonte do t’u përgjigjet pyetjeve në një qendër komuniteti, në një zonë ku stabilimenti “Rouge Plant”, fabrika historike e Ford-it lëshon një aromë të athët.
Në xhaminë e American Muslim Society, pas faljes së orës 18:30, Adel shtrëngon duart dhe thotë se shpejt do të organizojë një event për të mbledhur fonde: fushata i kushton 14.000 $. Ndërmjet kushërinjve të tij, më aktivi është Nagi Mohamed, 21 vjeç, student në mjekësi.
Mendimi i tij për zgjedhjet?
“Jetojmë si në një majë vullkani. Dua që të kthehet situata normale”, thotë studenti i mjekësisë.
“Vullkani” për të cilën flet ai, është klima e dyshimit me të cilën përballen muslimanët në SHBA, ku në këtë vend jetojnë prej 15 vitesh.
“Vështirësitë e vërteta nisin kur ndodhesh jashtë Dearborn”, pohon Adel e vazhdon: “epitete, sharje…Nëse kaloj doganën në aeroport më kontrollojnë imtësisht…”.
Më pas vjen tensioni dhe provokimet e Donald Trump që natyrisht nuk ndihmojnë.
“Ka një ankth mbi atë që ai ka deklaruar për muslimanët. Njerëzit do të votojnë në masë Hillary-n, edhe pse ajo nuk i bind të gjithë”, thotë Adel.
Turneu i fushatës mbyllet në mitingun që u zhvillua në American Muslim Center, një kompleks i ngritur në lagjen më të gjallë të Dearborn.
Ka qenë një kishë dikur.
“Nuk kishte më besimtarë dhe kështu karabinaja iu shit komunitetit musliman që e transformoi në një xhami”, thekson ai.
Përgatiti Y.Pata- /tesheshi.com/
