Batuta dhe përplasje të ashpra kanë zhvilluar në mbledhjen e Këshillit të Sigurimit të OKB-së ambasadorja e Kosovës në Nju-Jork, Vlora Çitaku, dhe shefi i diplomacisë serbe, Ivica Daçiq.
Në fjalën e tij, Daçiq iu referua Çitakut si përfaqësuese e “institucioneve të përkohshme të Kosovës dhe Metohisë”.
Ai foli për serbët në Kosovë, duke thënë se Asociacioni i Komunave me Shumicë Serbe është institucion për realizimin e të drejtave themelore të serbëve të Kosovës. Daçiq tha se formimi sa më i shpejtë i asociacionit siguron zbatimin e marrëveshjes së arritur në Bruksel mes dy palëve.
I ashpër tingëlloi reagimi kur iu kundërpërgjigj ambasadores Çitaku, që ia rikujtoi se Kosova është shtet i pavarur.
“Kosova nuk është e shqiptarëve. As e jotja, as e imja. Eshtë e qytetarëve që jetojnë atje, e aty ka serbë dhe shqiptarë. Ju keni një vend të shqiptarëve që quhet Shqipëri,” tha Daçiq.
Duke folur për marrëveshjen për asociacionin, ai u shpreh se Kosova nuk mund të bëjë marrëveshje dhe pastaj ta dërgojë atë në Kushtetuese.
Daçiq deklaroi se Kosova nuk është e pavarur, sepse, sipas tij, po të ishte e tillë, nuk do ta nënshkruante marrëveshjen për MSA-në si territor, por si vend. Ai madje i falënderoi të gjitha vendet që nuk e kanë njohur Kosovën.
Ndërsa ambasadorja Vlora Çitaku tha se Kosova do të bëjë çdo gjë që ta ketë flamurin në të gjitha organizatat ndërkombëtare. Ajo theksoi në fjalën e vet se vendi i saj është i gatshëm të ballafaqohet me të kaluarën, dhe sugjeroi që njëjtë gjë të bëjë dhe Serbia.
“Do t’i zbatojmë marrëveshjet në Bruksel, por jo në dëm të funksionalitetit të shtetit tonë. Ne jemi për
pajtim. Por pajtimi nuk mund të ndërtohet me mohim. Ai mund të ndërtohet nëse ne vështrojmë përpara dhe e shikojmë të kaluarën pa frikë, edhe pse për disa ky shikim mund të jetë i turpshëm,” ka thënë Çitaku.
Gjatë fjalimit të saj në Këshillin e Sigurimit të Organizatës së Kombeve të Bashkuara, ambasadorja Çitaku i ka përsëritur edhe një herë ministrit të Punëve të Jashtme të Serbisë, Ivica Daçiq, se Kosova është shtet i pavarur dhe kjo nuk do të ndryshojë.
Ajo ka thënë se duhet qartësuar për të gjithë qytetarët se dialogu me Serbinë që po zhvillohet në Bruksel nuk po bëhet për ta kthyer Serbinë në Kosovë, por për krijimin e raporteve fqinjësore mes dy vendeve.
“Dialogu nuk është për rikthim të Serbisë në Kosovë; Kosova është e pavarur, kjo nuk do të ndryshojë. Por ajo që duhet të ndryshojë është qëndrimi i Serbisë ndaj nesh. Dialogu është që të sigurohemi që ne e trajtojmë njëri-tjetrin me dinjitet, si dy shtete që do të jenë fqinje. Këtë dialog e do Kosova,” do të theksonte ambasadorja e Kosovës.
“Klima politike është e ashpër, shpesh e tensionuar. Ne jemi një demokraci e re dhe akoma po mësojmë. Kuvendi i Kosovës e ka zgjedhur presidentin e ri me 71 vota; ka patur protestë dhe festë. Ndërsa liderët tanë kanë mosmarrëveshjet e tyre, askush të mos ketë dyshim për aspiratat tonë kolektive për integrim dhe vlera atlantike. Ratifikimi i MSA-së është vërtetim i këtij rrugëtimi,” ka vazhduar Çitaku.
Ajo ka kujtuar luftën dhe terrorin në Kosovë gjatë luftës. Ka përmendur edhe viktimat e dhunës seksuale, për të cilat kërkoi drejtësi.
“Në emër të të gjitha atyre, unë kërkoj drejtësi. Ne duhet t’i shohim autorët pas hekurave, dhe ne kemi nevojë që në mënyrë kolektive dhe globale të bëjmë më shumë, në mënyrë që viktimat e dhunës seksuale gjatë luftës, por edhe kudo në botë, të ndjehen të mbështetura dhe jo vetëm,” ka thënë ajo.
Këshilli i Sigurimit i Kombeve të Bashkuara ka debatuar për situatën në Kosovë, ku është përmendur edhe kriza politike në vend, për çka është thënë që dhuna nuk duhet përdorur as brenda e as jashtë institucioneve. /tesheshi.com/
