Vendimi i autoriteteve suedeze për të mos futur karantinë si në shumicën e vendeve evropiane fillimisht u mbështet nga qytetarët, por në javët e fundit ka pasur kritika në rritje për shkak të shkallës së lartë të vdekshmërisë në krahasim me fqinjët e tjerë nordikë, veçanërisht në mesin e popullatës së moshuar.
Kështu, një përqindje e lartë ose relativisht e lartë e qytetarëve që besojnë në aftësinë e qeverisë për të menaxhuar një pandemi, ra në 45 përqind në qershor, nga 63 përqind në prill, sipas një studimi të Novus të bërë për kanalin televiziv publik SVT.
Mbështetja për Agjencinë Suedeze të Shëndetit Publik, e cila zhvilloi një fushatë për të ruajtur distancën fizike dhe masat e higjenës, gjithashtu ra nga 73 në 65 përqind.
Masat e moderuara në vend të karantinës
Në një sondazh të veçantë të Demosco për të përditshmen Aftonbladet, numri i atyre që kanë besim të lartë ose relativisht të lartë në veprimet e qeverisë në lidhje me pandeminë e virusit koronar ra nga 65 përqind në prill në 55 përqind, raporton Reuters.
“Duke marrë parasysh që shifrat e vdekshmërisë suedeze ndryshojnë nga shifrat ndërkombëtare, është befasuese që niveli i besimit ka mbetur kaq i lartë,” komentoi analisti i Demosco, Peter Santesson. “Kjo tregon nivelin e lartë të besimit tek autoritetet publike që ekziston në Suedi,” shtoi ai.
Ndërsa shumica e Evropës ka futur karantinë në luftën kundër pandemisë, Suedia është mbështetur në masa më të moderuara, të bazuara në vullnetarizmin, për të ngadalësuar epideminë dhe për të bërë më pak dëm për ekonominë.
Një numër i madh i vdekjeve
Sidoqoftë, numri i vdekjeve të raportuara në lidhje me koronavirusin është shumë herë më i lartë sesa në Norvegji, Danimarkë dhe Finlandë, pasi 4500 njerëz vdiqën në Suedi.
Kjo është një normë prej 443 vdekjeve për milion banorë, sipas portalit Ourëorldindata, dhe për shumicën e majit ishte më e larta në Evropë. Danimarka kishte 100 vdekje në të njëjtën kohë, Norvegjia 44, dhe Finlanda 58 vdekje për milion banorë.
Këto ditë, epidemiologu kryesor suedez Anders Tegnell në parim ka mbrojtur strategjinë suedeze, por ai pranoi se më shumë mund të ishin bërë në luftën kundër virusit. /tesheshi.com/
