Ngacmimet raciste kundër myslimanëve në Britani të Madhe janë shtuar dukshëm, sidomos pas sulmeve terroriste të kryera në Paris dhe atyre në Belgjikë.
Shënjestër e sulmeve kryesisht janë femrat myslimane me shami, të moshës prej 14 deri 45 vjeç, ndërkaq sulmuesit kryesisht janë meshkuj të moshës 15 deri 35 vjeç.
Dhe ky numër ka tendencë rritjeje për shkak se viktimat në shumicën e rasteve frikësohen të lajmërojnë policinë.
Por javën e kaluar, dy vajza myslimane, vendosën që të veprojnë pak më ndryshe në provokime të ngjashme, dhe ky veprim i tyre shkaktoi reagime të papara pozitive në rrjetet sociale.
Kalsoom Naqvi dhe shoqja e saj Tayiba Hussain, po ecnin nëpër qendrën e qytetit në Exeter, kur një qytetar duke kaluar pranë tyre bëri disa komente raciste.
“Shkoni në vendet prej nga keni ardhur”, dhe “çdo moment pritet të shpërthejë”, ishin komentet e personit që i la të shokuara dy shoqet nga ajo çfarë dëgjuan.
Por në vend që t’a lënë me kaq, ato vendosin t’a pyesin personin për arsyen se pse po shprehej ai në këtë mënyrë?
Përgjigjen që morën nga personi, e regjistruan të tërën, pastaj e postuan në internet, dhe tashmë ajo çfarë thotë ai në video ka bërë që gjithë bota të qesh me të.
Problemi që kishte personi në fjalë, është se si ka mundësi që dikush i lindur si ai në Britani të Madhe mund të jetë aq britanik sa edhe vetë ai, dhe për më shumë siç mund ta shihni në video, ai vazhdon të ofendojë me fjalë të vrazhda.
“A e dini se cili është problemi më i madh në këtë vend? Muslimanët kanë invaduar gjithë vendin për momentin sikur insektet kaçabu”, dëgjohet të thotë ai.
Kur Kalsoom e pyet se çfarë e shtyu që ai reagojë në atë mënyrë, ai bën me shenjë në drejtim të shamisë. Duke mos duruar dy vajzat të thonë se edhe ato janë britanike, ai largohet.
Në fund të videos një person ju afrohet vajzave për t’i pyetur se a janë mirë.
Shumë njerëz kanë qenë të shpejtë për të përgëzuar dy vajzat myslimane për iniciativën dhe guximin e konfrontimit me personin e panjohur.
Siç komentoi një person:
“Kjo video më bëri të zemëruar në njërën anë dhe me dha shpresa në anën tjetër. Ju jeni ardhmëria jonë dhe për këtë u jam shumë mirënjohës. Ju nuk keni përgjegjësi në përfaqësimin e femrave, e as në përfaqësimin e fesë suaj, por në të dyja, ju bëtë një punë të shkëlqyeshme.”
Kalsoom më vonë kishte biseduar me policinë.
Duke shkruar në Facebook, ajo falendëroi pa masë të gjithë për mbështetjen e fuqishme dhe shpreson që në të ardhmen më shumë njerëz do të ngrejnë zërin kundër racizmave të ngjashëm.
“… ju lutem, ju lutem, ju lutem, kurrë mos qëndroni duarkryq kur e shihni këtë duke i ndodhur dikujt.”
Ndërkaq Tayiba shtoi:
“Pajtohem. Mos kini frikë të ballafaqoheni me dikë si ky person. Dhe kurrë mos harroni se çelësi është tek dëshmia. Regjistroni çdo gjë që ju ndodh. Ky person përfaqëson një grup të vogël njerëzish. Sidoqoftë, njerëzit që qëndrojnë anash dhe nuk reagojnë janë shumica, dhe kjo më bën të mërzitem më shumë se fjalët e tij. Ne duhet të reagojmë kur shohim diç të tillë në vendin tonë. Unë për vete do të ngrejë zërin, edhe nëse do të jem zë i vetmuar”. /tesheshi.com/
