Rekord azilkërkuesish në Gjermani

Në Gjermani, numri i azilkërkuesve u rrit ndjeshëm vitin e kaluar, i cili tani është 217,774, së bashku me më shumë se një milion refugjatë nga Ukraina, të cilët nuk kanë nevojë të aplikojnë për azil për të marrë mbrojtje.

“Në Gjermani, 217,774 persona kanë aplikuar për herë të parë për azil në vitin 2022, që është një rritje prej 47 për qind krahasuar me një vit më parë”, njoftoi Enti Federal i Statistikave në Wiesbaden.

Numri më i madh i azilkërkuesve vjen nga Siria, pasuar nga Afganistani, Iraku dhe Gjeorgjia.

Pothuajse një milion refugjatë që mbërritën në Gjermani pas sulmit rus në Ukrainë nuk janë përfshirë në këto statistika, sepse, sipas udhëzimeve të Bashkimit Evropian, ata nuk janë të detyruar të aplikojnë për azil për të marrë mbrojtje.

Kështu, numri i personave që kërkuan mbrojtje në Gjermani brenda një viti e ka tejkaluar shifrën e vitit 2016, kur pothuajse një milion refugjatë nga Siria mbërritën në Gjermani.

Një vendim pozitiv është marrë në 17 për qind të të gjitha kërkesave të paraqitura për azil, dhe 21 për qind janë refuzuar.

Në raste të tjera, mbrojtja është dhënë deri në një njoftim të dytë, për shkak të rrezikut të mundshëm në rast të kthimit në vendlindje.

Ministrja e Brendshme gjermane Nancy Faeser tha se numri i azilkërkuesve po rritet pavarësisht masave të shumta që synojnë reduktimin e kalimeve të paligjshme kufitare.

“Ne kemi miratuar shumë masa për të drejtuar dhe kufizuar më mirë migrimin drejt Gjermanisë”, tha ajo, duke reaguar ndaj statistikave të fundit.

Masat e forcuara përfshijnë forcimin e kontrolleve kufitare drejt Austrisë dhe Republikës Çeke, si dhe shtimin e deportimit të personave të cilëve u është refuzuar kërkesa për azil. /tesheshi.com/